F'intervent qasir fi tmiem diskussjoni tal-Plenarja li trattat l-immigrazzjoni il-President tal-Parlament Ewropew Roberta Metsola appellat biex l-ebda mara fl-Ewropa ma tgħix fil-biża'. "In-nisa jixraqilhom li jgħixu 'l bogħod mill-biża'," sostniet Metsola hekk kif tkellmet dwar il-qtil ta' Bernice Cassar li ddeskrivietha bħala "eżempju ieħor ta' mara li inqatlet, sempliċiment għax hija mara."
"Ieqfu oqtlu lin-nisa. Ieqfu sawtu lin-nisa, Ieqfu abbużaw lin-nisa," sostniet il-President Metsola li qalet ukoll illi minkejja li Cassar kienet talbet għall-għajnuna u l-protezzjoni, "hi tħalliet waħedha."
Għalhekk kompliet issostni illi hemm bżonn ta' qafas li joffri l-protezzjoni meħtieġa, li hemm bżonn illi l-istituzzjonijiet ma jibqgħux 'għomja' u li kull pajjiż Ewropew jirratifika l-Konvenzjoni ta' Istanbul. Malta diġà hija firmatarja ta' din il-konvenzjoni, anke jekk ilbieraħ il-Malta Women's Lobby sostna li hemm bżonn li jitħaddem b'mod effettiv.
"Suppost kellha tmur id-dar, suppost kellha tkun sikura, suppost ma kellhiex tinqatel," saħqet Metsola illi ddeskriviet lil dawk li jgħaddu minn esperjenza ta' vjolenza domestika bħala "eroj"
Ilbieraħ filgħodu Bernice Cassar inqatlet mir-raġel tagħha f'Raħal Ġdid, bl-akkużat imbagħad jingħalaq fid-dar tiegħu fejn hemm operazzjoni tal-pulizija damet għaddejja sas-sigħat bikrin ta' dalgħodu, meta Roderick Cassar kien arrestat.
