Malta kisbet €12.35 miljun f’finanzjament mill-Unjoni Ewropea għat-tieni fażi tal-proġett tagħha ta’ provvista ta’ enerġija mill-art fil-Malta Freeport, wara proċess kompetittiv ta’ selezzjoni taħt il-programm Connecting Europe Facility (CEF) tal-Kummissjoni Ewropea.
Il-proġett, immexxi mill-Ministeru għall-Ekonomija flimkien mal-Malta Freeport Corporation, huwa fost erba’ biss minn 20 proposta sottomessa minn stati membri tal-UE li ġew approvati.
Din it-tieni fażi se tara installazzjoni ta’ konnessjonijiet ta’ enerġija mill-art ta’ vultaġġ għoli tul il-Moll tan-Nofsinhar Terminal 2 u l-Moll tal-Punent Terminal 1, sabiex il-vapuri li jiddokkaw ikunu jistgħu jitfu l-magni awżiljarji tagħhom u jikkonnettjaw ma’ elettriku aktar nadif minn fuq l-art.
L-investiment totali f’din il-fażi jammonta għal €18.4 miljun, bil-UE se tiffinanzja kważi 70% tal-ispejjeż.
Il-proġett jibni fuq l-ewwel fażi li diġa' tinsab għaddejja, li qed tiġi kofinanzjata permezz tal-Just Transition Facility tal-UE u tiffoka fuq il-provvista ta’ enerġija mill-art għal vapuri li jiddokkaw fuq il-Moll tat-Tramuntana Terminal 1 u Terminal 2. Iż-żewġ fażijiet flimkien jiffurmaw strateġija komprensiva biex jiġi elettrifikat il-port kollu tal-Malta Freeport, li jagħmel parti mill-Port Ewlenin tan-Network TEN-T f’Marsaxlokk.
Dan huwa r-raba’ proġett ta’ enerġija mill-art f’Malta, b’żewġ proġetti oħra qed jitwettqu fil-Port il-Kbir fil-Belt Valletta, li huwa wkoll identifikat bħala Port Ewlenin tan-Network TEN-T.
Fi stqarrija, il-ministeru enfasizza l-benefiċċji ambjentali tal-proġett, billi qal li l-elettrifikazzjoni mill-art tnaqqas b’mod sinifikanti l-emissjonijiet ta’ gassijiet serra u t-tniġġis bil-ħoss, billi telimina l-ħtieġa li l-vapuri jżommu l-magni tagħhom mixgħula waqt li jkunu ddokkjati.
