Filmat | Rigal għall-Milied? Malta jista' jkollha l-vaċċin kontra l-Covid-19 qabel l-aħħar tal-2020
Dan hekk kif l-Aġenzija Ewropea għall-Mediċini ħabbret li se tkun qed tiltaqa' nhar it-Tnejn li ġej biex tiddeċiedi dwar l-approvazzjoni għall-użu tal-vaċċin ta' Pfizer
minn Yendrick Cioffi
L-Aġenzija Ewropea għall-Mediċini ħabbret li se tkun qed tiltaqa' nhar it-Tnejn li ġej biex tiddeċiedi dwar l-approvazzjoni għall-użu tal-vaċċin ta' Pfizer u BioNTech fil-pajjiżi kollha tal-Unjoni Ewropea.
Oriġinarjament, l-Aġenzija Ewropea għall-Mediċini kellha tiddeċiedi dwar il-vaċċin fid-29 ta' Diċembru. Dan ifisser li hemm possibbilità kbira li sal-aħħar tal-2020, l-ewwel Ewropej, inkluż Maltin, jibdew jitlaqqmu kontra l-Covid-19.
Fl-ewwel kummenti tiegħu, id-Deputat Prim Ministru u Ministru għas-Saħħa Chris Fearne saħaq li Malta kienet fost il-pajjiżi li ħeġġet lill-Aġenzija Ewropea għall-Mediċini biex fi kliemu, "dak li tista' tagħmel f'siegħa ma tagħmlux f'sagħtejn," filwaqt li żżomm l-istess livell ta' skrutinju.
Ikkonferma li l-vot tal-Kummissjoni Ewropea dwar din l-approvazzjoni jkun qed jittieħed ġimgħa qabel previst, li jfisser li l-vaċċin jista' jibda jasal bejn l-aħħar ġranet tal-2020 u l-ewwel ġranet tas-sena l-ġdida.
Jiem ilu, meta kien qed jindirizza l-Parlament, id-Deputat Prim Ministru u Ministru għas-Saħħa Chris Fearne kien qal li Malta se tirċievi l-vaċċin mal-bqija tal-pajjiżi tal-Unjoni Ewropea hekk kif kienet il-Kummissjoni Ewropea li b'mod kollettiv laħqet ftehim ma' Pfizer u BioNTech u anke ma' kumpaniji oħra, inkluż Moderna u AstraZeneca li l-vaċċin tagħhom ukoll jinsab fi stadju avvanzat.
Malta għandna allokati 500,000 doża tal-vaċċin ta' Pfizer, jiġifieri biżżejjed biex jitlaqqmu 250,000 persuna.
"Kull ġurnata tgħodd," kitbet il-President tal-Kummissjoni Ewropea Usola von der Leyen li faħħret din id-deċiżjoni.
L-ewwel persuni li se jitlaqqmu f'Malta se jkunu l-frontliners kollha, inkluż it-tobba, l-infermiera u l-ispiżjara, l-anzjani li għandhom 'il fuq minn 85 sena u anke dawk residenti fi djar tal-anzjani.
Every day counts - we work at full speed to authorise #COVID19 vaccines that are safe & effective.
— Ursula von der Leyen (@vonderleyen) December 15, 2020
I welcome @EMA_News bringing forward its meeting to discuss the @pfizer/BioNTech vaccine, before Christmas.
Likely that the first Europeans will be vaccinated before end 2020!
Wara jkun imiss anzjani oħra li wkoll għandhom viċin it-80 sena, frontliners oħra fosthom il-Pulizija, l-għalliema u anke l-persuni li jbatu minn mard kroniku.
L-istess vaċċin diġà ġie approvat u beda jingħata fir-Renju Unit u fl-Istati Uniti.
Aqra wkoll:
