Raġel, li ma jistax jissemmielu ismu minħabba ordni tal-qorti, xehed kontra żewġ eks ħbieb tiegħu – Besim Borici, ta’ 39 sena, u Ergest Kashari, ta’ 34 sena – li jinsabu akkużati bil-qtil attentat, akkużi li huma ċaħdu l-ġimgħa li għaddiet.
Il-vittma rrakkonta kif kien maħkum darbtejn minn dawn iż-żewġ irġiel, li darba kienu l-eqreb ħbieb tiegħu.
Ix-xhud qal li qabel l-inċident kien mar jiltaqa’ ma’ ħabib għall-kafè u mbagħad flimkien marru l-Feel Lounge fil-Ħamrun, madwar nofsillejl. Huwa qal li r-relazzjoni tiegħu mal-akkużati kienet sfaxxat madwar tmien xhur qabel, iżda dak il-lejl ikkuntattja lil Kashari biex jistaqsi x’kien mar ħażin bejniethom.
Kashari weġbu li “kien inbidel”, iżda l-vittma ċaħad dan. Minn hemmhekk il-konversazzjoni eskalat fi ġlieda fiżika. “Ma niftakarx eżatt x’qalli, imma deher nervuż u aġitat,” qal ix-xhud. Ftit tal-mumenti wara, Borici laqtu b’oġġett u induna li kien qed joħroġ id-demm minn żaqqu.
Il-vittma waqa’ mal-art u kellu bżonn l-għajnuna biex iqum. Ħabib tiegħu mexxieh sa ħanut tat-takeaway u minn hemm ġew diretti lejn l-għassa tal-pulizija. Huwa ntilefminn sensih u reġa’ qam biss wara operazzjoni ta’ emerġenza f'Mater Dei.
Il-qorti semgħet li sa issa sarulu żewġ operazzjonijiet minħabba l-ġrieħi.
Filwaqt li għaddew l-argumenti dwar il-ħelsien mill-arrest, l-avukati tad-difiża saħqu li l-provi kollha ġew ippreservati mill-inkjesta. L-avukata Anthea Bonnici Zammit fakkret li Borici għandu rekord kriminali nadif u ilu jgħix Malta għal tmien snin, fejn jixtieq jirritorna għand martu u bintu ż-żgħira.
L-avukat Franco Debono qal ukoll li ħafna każijiet ta’ qtil attentat jispiċċaw jiġu kkwalifikati bħala ġrieħi gravi.
Rigward Kashari, impjegatur tiegħu xehed li ilu jaħdem miegħu bħala elettriċista għal sitt snin, filwaqt li ħuh offra ruħu bħala garanzija.
Il-prosekuzzjoni, rappreżentata mill-avukati tal-Avukat Ġenerali Jennifer Polidano u Jurgen Dalli flimkien mal-Ispettur Sarah Kathleen Zerafa, irrimarkat li l-akkużi huma serji u li għad hemm riskju ta’ tfixkil tal-provi, speċjalment billi għad hemm xhud ewlieni – il-ħabib tal-vittma – li għadu ma xehedx.
Il-Maġistrat Marseann Farrugia qalet li ma kienx ġust u lanqas legali li wieħed jinżamm arrestat biss minħabba li l-prosekuzzjoni għadha ma identifikatx ix-xhieda kollha. Fl-istess ħin, enfasizzat li l-investigazzjonijiet tal-pulizija għandhom jitlestew mill-aktar fis.
L-avukati Franco Debono, Adreana Zammit u Anthea Bonnici Zammit dehru għal Borici, filwaqt li Shaun Zammit deher għal Kashari.
