Ħabta bejn mutur u karozza f’Ħal Għaxaq tħalli raġel bi ġrieħi gravi

Ilbieraħ filgħaxija, għall-ħabta tas-sitta, seħħ inċident tat-traffiku fi Triq Dawret Ħal Għaxaq, li fih kienu involuti mutur u karozza. Il-Pulizija kienet infurmata immedjatament u marret fuq il-post biex tinvestiga x’ġara.

Minn stħarriġ preliminari rriżulta li l-inċident seħħ bejn karozza tat-tip Volvo XC60, misjuqa minn raġel ta’ 42 sena residenti f’Ħal Għaxaq, u mutur tat-tip Malaguti Madison misjuq minn raġel Brażiljan ta’ 29 sena li joqgħod iż-Żurrieq.

Tim mediku kien ukoll imsejjaħ fuq il-post u l-ambulanza ħadet lis-sewwieq tal-mutur l-Isptar Mater Dei għall-kura meħtieġa. Aktar tard, huwa ġie ċċertifikat li sofra ġrieħi ta’ natura gravi.

L-investigazzjonijiet tal-Pulizija dwar dan l-inċident għadhom għaddejjin.