Ħaddiem iweġġa' fl-istess sit ta' kostruzzjoni li waqatlu l-faċċata fi Frar li għadda

Ħaddiem tal-kostruzzjoni ta’ nazzjonalità Marokkina weġġa’ wara li xi brikks li kien qed jaħdem bihom waqgħu fuqu nhar il-Ħamis filgħodu.

Kelliem għall-Pulizija kkonferma li l-inċident seħħ għall-ħabta tad-9:40am, fi Triq Belvedere, Gżira. L-inċident seħħ fl-istess sit fejn il-faċċata tal-binja kienet iġġarfet f’Frar li għadda.

Ir-raġel, ta’ 34 sena li jgħix f’Ħal Qormi, kien qed jaħdem fuq ċint meta ġara l-inċident.

Il-vittma ttieħed b’emerġenza lejn l-Isptar Mater Dei, iżda s’issa l-kundizzjoni tiegħu għadha mhix magħrufa mill-Pulizija.

L-awtoritajiet qed jinvestigaw l-inċident biex jistabilixxu eżattament x’ġara.