Żagħżugħ ingħata sentenza sospiża wara li ammetta li hedded lill-eks sieħba tiegħu li jxerred ir-ritratti tagħha għarwiena jekk ma taċċettax li jibqa’ jara lil ibnu.
Iż-żagħżugħ, li għandu 25 sena, tressaq il-Qorti dalgħodu. Huwa kien akkużat b’theddid u b’użu ħażin ta’ mezzi ta’ kommunikazzjoni. Kien akkużat ukoll li sar reċidiv.
Fil-fatt, iż-żagħżugħ qed jiffaċċja wkoll akkużi ta’ serq u pussess aggravat ta’ droga, fi proċeduri separati.
Jidher li ż-żagħżugħ hedded lill-eks sieħba tiegħu li kien lest jippubblika ritratti tagħha għarwiena, liema ritratti bgħatithomlu meta kienu għadhom flimkien.
Il-koppja għad ma għandhomx ftehim formali dwar il-kustodja ta’ binhom.
Fuq talba tad-Difiża, il-każ kien diskuss fil-privat mal-Maġistrat.
Meta marru lura f’posthom, id-Difiża informat lill-Maġistrat li l-akkużat qed iwieġeb ħati.
Huwa ngħata sentenza ta’ sena ħabs sospiża għal sentejn u anke kien ordnat iħallas multa ta’ €100.
Għall-istess perjodu, kien ordnat ukoll ma jersaqx lejn l-eks sieħba tiegħu u ordnatlu biss jagħmel kuntatt magħha biex ikellimha dwar it-tifel.