Dalgħodu - quddiem il-Maġistrat Joe Mifsud - kompliet il-kumpilazzjoni tal-evidenza kontra Victor Dragomanski, akkużat bil-qtil ta' Christian Pandolfino ta' 58 sena u s-sieħeb tiegħu Ivor Maciejowski ta' 30 sena. Matulha l-Ispettur Saviour Baldacchino sostna illi wara li kien arrestat Dragomanski sostna li "ried illi jitpoġġa fl-istess ċella mal-Albaniż. Huwa qal illi jekk jitpoġġa fl-istess ċella miegħu joqtlu għaliex kien hu li daħħlu f'dan l-inkwiet."
Dragomanski kien qed jirreferi għal Daniel Muka, l-ewwel persuna li kien arrestat b'rabta mal-omiċidju tal-koppja f'Tas-Sliema.
L-avukat Joe Brincat staqsa jekk hux vera li Dragomanski kien irrabjat ħafna għal Muka, bl-Ispettur iwieġeb fl-affermattiv. 'Qal illi kien l-Albaniż li spara lejn l-irġiel?' staqsa Brincat, bl-Ispettur jgħid li l-investigazzjonijiet għadhom għaddejjin.
Tabib fl-Emerġenza - Dr. Jonathan Joslin - ukoll xehed u qal illi minħabba il-mod kif kien mifrux id-demm u l-bullets, "wasalna għall-konklużjoni li din kienet sparatura. Pandolfino ma kienx qed jieħu nifs u ma beda juri ebda sinjali ta' ħajja."
Dwar Maciejowski Joslin qal li l-istess sar mat-tieni vittma, li kien iddikjarat mejjet fuq il-post ukoll.
Fi tmiem is-seduta l-Qorti ddeċidiet illi kien hemm biżżejjed evidenza prima facie biex Dragomanski jitpoġġa taħt att ta' akkuża.
Il-Każ issa se jkompli nhar l-10 ta' Novembru. L-avukat Joe Brincat qed jidher għall-akkużat filwaqt li l-avukat Joe Giglio qed jidher parte civile.
L-Ispetturi James Grech u Colin Sheldon mexxew il-prosekuzzjoni.