Raġel li kien hedded lill-MEP Nazzjonalista Roberta Metsola apoloġizza u qal li qatt ma kienet l-intenzjoni tiegħu li jweġġa' lil xi ħadd.
Ir-raġel in kwistjoni kien ħalla messaġġ fuq Facebook illi fih qal li Metsola aħjar toqgħod attenta għax tispiċċa bħal Daphne Caruana Galizia.
L-akkużat, minn dakinhar kien waqqaf il-paġna tiegħu fuq Facebook u apoloġizza, filwaqt li ammetta l-ħtija miġjuba kontrieh.
Il-Maġistrat Joe Mifsud qal illi filwaqt li kulħadd għandu dritt jesprimi lilu nnifsu, "ħadd m'għandu jħossu mhedded u ħadd m'għandu dritt jinstiga l-impressjoni li xi ħadd għandu jinqatel."
"Daphne Caruana Galizia ma missa qatt spiċċat kif spiċċat. Tħalliet ferita f'pajjiżna" sostna Mifsud.
Il-Qorti ħarġet ordni ta' protezzjoni kontra l-akkużat, li ngħata l-libertà proviżorja għal tliet snin.
L-Ispettur Joseph Scerri mexxa l-prosekuzzjoni, filwaqt li Angele Formosa mexxiet id-difiża.