Raġel ta' 52 sena li joqgħod Marsalforn ġie lliberat minn akkuża li ħdax-il sena ilu kkorrompa lil bintu, li dak iż-żmien kellha 15-il sena. Il-Qorti qalet li ma tistax tistrieħ fuq dak li qalu l-vittma, ommha u l-Ispettur li investiga l-każ. Fil-fatt, il-Maġistrat Joe Mifsud mhux talli llibera lil missier minn kull akkuża, iżda qal li martu kellha aġenda moħbija wara dawn il-proċeduri.
L-akkużi bdew mill-2005 fejn ir-raġel ġie mixli b'dawn l-akkużi wara rapport li sar minn bintu stess fl-2010. Hija kienet allegat li l-korruzzjoni seħħet fi tliet okkażjonijiet. It-tifla ma tatx id-dati ta’ dawn l-allegati inċidenti, iżda tgħid li seħħew waqt li kienet qed tistudja għall-O-Levels.
Hija qalet li l-ewwel inċident kien meta darba kellha l-influwenza u missierha qalilha biex jagħmlilha l-Vicks. Qalet li missierha qabad il-Vicks u għorkilha għonqha u sidirha. Dan ġara fil-kamra tas-sodda fejn hija u oħtha kienu jorqdu.
It-tieni inċident seħħ meta t-tifla kellha xi ħafas ma’ daharha u ma’ żaqqha. Dwar din l-okkazzjoni l-minuri qalet li kienet ommha stess li infurmat lil missierha li hija kellha l-ħafas. Skontha, missierha mar biex jara dawn il-ħafas u qalilha biex tgħolli l-flokk. Qalet li hija għolliet il-flokk sa taħt sidirha, u allegat li missierha messilha saqajha.
Dwar it-tielet inċident, il-minuri qalet li darba minnhom, waqt li kien qed jinħasel, missierha kien talabha ġġiblu qalziet ta’ taħt. Qalet li sakemm kienet qed tagħlaq il-kexxun, daħal fuqha imma ma kellux xugaman. Tgħid ukoll li missierha kien jara l-pornografija fuq it-televiżjoni u meta kien ikun bix-xugaman kienet tarah jaqbad il-parti tiegħu waqt li jibqa’ bix-xugaman.
Il-Qorti tirrimarka li huwa għajb għas-soċjetà u għall-familji, meta jitħawdu l-elementi ta’ żina (rikjesti għall-akkuża ta’ korruzzjoni ta’ minorenni) ma’ dawk ta’ mħabba u rispett ta’ ġenitur fil-konfront tat-tfal tiegħu, li nkwetat li t-tfal tiegħu huma morda u jagħmlilhom dak li għandhom bżonn u jieħu ħsiebhom, għaliex inkella se naslu fi stat ridikolu.
Inkunu wasalna fi stat fejn il-missier ma jistax jgħannaq lil bintu, fejn il-missier jibża' jagħti banju lit-tfal tiegħu ta’ ftit snin ma jmurx jiġi akkuzat b’korruzzjoni tal-minuri u ma jistax lanqas biss jikkunsidra li jirrikorri biex jiehu hsieb bintu meta din tkun ghadha żgħira u tkun ma’ tiflahx.
Dan ikun għajb ikbar għas-soċjetà in ġenerali u għall-ġustizzja, speċjalment tenut kont tal-fatt li qed isiru sforzi kbar biex il-ġenituri jkollhom sehem indaqs fit-trobbija ta’ wliedhom fejn anke daħal il-kunċett ta’ parental leave li jista’ jittieħed mill-missier.
Il-Qorti tikkondividi l-ħsieb tal-Qorti diversament preseduta f’każ ta’ rapport li sar mill-mara u t-tfal fil-konfront tar-raġel, fejn illiberat lill-imputat mill-akkużi kollha li bihom kien rinfaċċjat u kkummentat ukoll li mart l-imputat kellha aġenda moħbija wara dawn il-proċeduri kriminali. Il-Qorti qalet is-segwenti:
“Il-Qorti nnotat li din il-kawża damet għaddejja kważi ħames snin għal raġuni jew oħra u rat li bejn il-partijiet hemm mibegħda kbira li sfortunatament qed twassal lill-kwerelanti tħejji rapporti fil-konfront ta’ żewgha li m’humiex fondati. Sfortunatament il-vittmi f’dan il-każ huma wlied l-istess kwerelanti u l-imputat li jkollhom jixhdu fi proċeduri kriminali fil-konfront ta’ missierhom fuq talba t’ommhom. Illi dan kollu ma jawgurax tajjeb u bla dubju qed jikkreja trawma fl-ulied li għad iridu jgħixu ħajjithom ukoll. Il-Qorti tissoleċita lill-pulizija eżekuttiva biex titratta ma’ dan il-każ b’aktar serjeta’ u tagħmel indaġini aktar profonda qabel ma tistitwixxi proċeduri oħra.
Dwar l-akkużi li l-imputat saq il-vettura tiegħu b’mod traskurat, perikoluż u negliġenti w b’veloċita’ eċċessiva, l-Qorti tagħmel referenza għax-xhieda li verament hi skarsa u ttenni li dawn l-akkużi lanqas ma ġew ippruvati. Il-Qorti tħoss li verament il-kwerelanti għandha aġenda moħbija ‘l għala għaddiet lil żewġha f’dan il-każ kriminali. Il-Qorti hija konvinta li l-imputat mhux xi bniedem kalm jew aħjar simpatiku, u dan anke mill-manjiera kif xehed, pero’ tħoss li l-kwerelanti Maryrose Pisani mhix xhud attendibbli u li rnexxielha tikkonvinċi lill-uliedha biex jixhdu bil-mod kif xehdu. Meta kienet fil-pedana tax-xhieda kienet wisq prepotenti u riedet tgħid iktar milli fil-fatt kienet preparata li tgħid, billi żżejjen diskorsha. Uliedha min-naħa l-oħra kellhom jiġu meghjjuna mill-pulizija biex jixhdu, a kuntrarju ta’ ommhom. Il-Qorti nnotat ukoll, minn qari tat- traskrizzjonijiet, li l-konjuġi xejn m’huma ġentili ma’ xulxin u ħlief jinsulentaw lil xulxin ma jagħmlux!”
