Il-PN jitlob biex terġa' ssir il-votazzjoni fil-ħabs; 'Għexieren' ta' priġunieri vvotaw illegalment'

Il-Partit Nazzjonalista talab biex il-votazzjoni fil-ħabs terġa' ssir għax qed jinsisti li għadd ta' priġunieri vvotaw illegalment.

F'ittra lill-Kummissjoni Elettorali, is-Segretarju Ġenerali tal-PN, Michael Piccinino qal li l-proċess tal-votazzjoni fil-ħabs kien mimli "b'nuqqasijiet serji."

Skont Piccinino, għexieren ta' priġunieri vvotaw minkejja li suppost ma nħarġilhomx dokument tal-vot. Huwa akkuża lill-Kummissjoni li naqset billi twaqqaf lil dawn il-persuni milli jivvotaw.

Insista li fil-ġranet ta' qabel, il-PN kien diġà ġibed l-attenzjoni dwar priġunier wieħed partikolari li mhux suppost kien fuq ir-reġistru elettorali.

Il-priġunieri vvotaw nhar is-Sibt li għadda. Sar magħruf li kien hemm priġunieri, fosthom Daren Debono, it-Topo, li tħalla jivvota minkejja li għandu sentenza ta' għaxar snin u nofs ħabs. It-Topo kien wieġeb ħati għall-attentat ta' serqa mill-HSBC lura fl-2010.

Skont il-liġi, priġunieri li jingħataw sentenza ta' aktar minn 12-il xahar ħabs, jitilfu d-dritt tal-vot. Jista' jkun hemm ukoll deċiżjoni mill-Qorti li tneħħi dan id-dritt.

Minħabba dan, il-PN qed jisħaq li l-proċess tal-votazzjoni li seħħ is-Sibt fil-ħabs għandu jkun "annullat" u jerġa' jseħħ mill-ġdid. Piccinino talab lill-Kummissjoni biex tieħu nota tat-talba tal-PN b'mod urġenti u qed jirriserva d-dritt li jieħu dan il-każ quddiem il-Qorti Kostituzzjonali.

Aqra wkoll:

•  'Lesti nieħdu kull azzjoni neċessarja jekk jirriżulta li jkun hemm nuqqasijiet fil-votazzjoni'