Illum il-Ministru Clyde Caruana saħaq li bħala parti minn pjan biex tkun salvata l-Air Malta, hemm bżonn li l-linja tal-ajru tnaqqas nofs il-ħaddiema tagħha.
Madanakollu dawn mhux se jispiċċaw bla xogħol. Il-Ministru ħabbar skema li permezz tagħha, dawk li japplikaw, se jkun qed jinstabilhom xogħol ieħor mal-Gvern.
Minn madwar 900 ħaddiem li hemm preżentement jaħdmu mal-Air Malta, dawn se jkunu qed jonqsu bin-nofs.
300 minnhom huma dawk il-ħaddiema tal-ground handling. Dan is-servizz se jieqaf kompletament u minflok se jibda jsir minn kumpanija privata li għalissa għadha ma ġietx identifikata.
Apparti dawn, se jkunu qed jitnaqqsu madwar 120 ħaddiem ieħor li jaħdmu jew fl-amministrazzjoni jew inkella bħala parti mill-cabin crew.
Kif se taħdem din l-iskema?
- L-iskema ta' trasferiment volontarju fetħet illum għal madwar 407 ħaddiema li jaħdmu fl-amministrazzjoni jew inkella li huma membri tal-cabin crew
- Minn dawn se jkunu qed jintagħżlu madwar 120 ħaddiem li hemm bżonn jitnaqqsu
- Dawk li japplikaw se jkunu qed jissejħu għal interview
- Konsulenti se jkunu qed jaraw il-ħiliet u l-bżonnijiet tagħhom biex dawn jiġu abbinati ma' opportunitajiet ta' xogħol li hemm mal-Gvern
- Id-deċiżjoni dwar ix-xogħol se tkun qed issir wara diskussjoni mal-ħaddiem
- Il-paga li dawn il-ħaddiema għandhom mal-Air Malta se tkun garantita fix-xogħol il-ġdid
- Dawn il-persuni jridu jkunu bdew jaħdmu fix-xogħol il-ġdid sal-ewwel ġimgħa ta' Marzu
Wara, l-istess skema se tkun qed tiftaħ għal dawk li jaħdmu fil-ground handling, bil-proċess u l-kundizzjonijiet se jkunu l-istess.
Dan il-proċess irid ikun lest kollu fl-ewwel sitt xhur tas-sena.
Bis-saħħa ta' din il-miżura biss, l-Air Malta se tkun qed tiffranka €15-il miljun.
Aqra aktar fuq:
