Melvin Theuma qal lill-Qorti li hu kien kera appartament lil wieħed mill-irġiel li qed ikunu akkużati li pprovaw iwettqu serqa mill-kwartieri tal-HSCB f’Ħal Qormi, fl-2010, liema serqa ġiet sfrattata wara li laħqu waslu l-Pulizija.
Theuma kien qed jixhed quddiem il-Maġistrat Monica Vella, fil-kumpilazzjoni tal-evidenza kontra Vince Muscat, il-Koħħu u Darren Debono, magħruf bħala t-Topo.
Fix-xhieda tiegħu, Theuma qal li Debono kien staqsih jekk kellux xi appartament li seta’ jikri.
“Krejtlu appartament il-Mosta għal xahar. Kien is-sajf u l-prezz kien €300. Darren Debono ħallas għalih,” qal Theuma. Kompla jisħaq li ma jiftakarx jekk Debono kienx akkumpanjat minn Alfred Degiorgio, il-Fulu.
L-attentat tas-serqa seħħ fl-istess lejl, f’Ġunju 2010, meta kien qed isir il-kunċert MTV fuq il-Fosos tal-Furjana.
Theuma qal li dakinhar tal-kunċert kien qed jiekol mal-familja meta rċieva telefonata mingħand Debono.
“Mort l-appartment. Kif tidħol, fuq ix-xellug hemm kamra tas-sodda. Sibt lil Darren Debono fuq is-sodda, bil-qalziet ta’ taħt u bid-demm ħiereġ minn siequ. Qaluli li l-Pulizija kienu sparawlu,” Theuma kompla jixhed.
Qal li Vince Muscat staqsih biex jgħinu jdewwih. “Aċċettajt imbagħad tlaqt mill-appartament. Kien hemm il-Pulizija fil-viċin,” insista.
Aktar qabel, Theuma xehed fil-kumpilazzjoni kontra Vince Muscat u qal li qatt ma ddiskuta s-serqa miegħu. Theuma qal li kien ilu jaf lil Muscat minn meta kienu tfal u kienu jitkellmu fuq il-logħob tal-azzard.
Muscat, Debono u Fabio Psaila qed ikunu akkużati bl-attentat ta’ din is-serqa fejn kienu ġew sparatati wkoll xi tiri. Din hija l-istess serqa li fiha, l-aħwa George u Alfred Degiorgio (akkużati bil-qtil ta’ Daphne Caruana Galizia) qed jimplikaw lill-eks Ministru Chris Cardona u lill-Ministru Carmelo Abela li dak iż-żmien kien iservi bħala maniġer tal-bank.
Id-Deputat Jason Azzopardi kien allega li Cardona kien ġie arrestat u interrogat fil-lejl stess li fih seħħet is-serqa, filwaqt li fl-aħħar ġimgħat kien sar magħruf li Carmelo Abela wkoll kien intalab jixhed dwar dan il-każ. Huwa dejjem insista li qatt ma kien taħt investigazzjoni, minkejja li dan l-aħħar reġa' ġie mitkellem mill-Pulizija.
Din kienet waħda minn sensiela ta’ serqiet li seħħew dak iż-żmien, fejn fost oħrajn, kienu nsterqu €1 miljun mill-HSBC ta’ Ħal Balzan u anke ammont ieħor mill-Casino di Venezia.
Theuma qed jixhed f’dan il-każ hekk kif din kienet waħda mill-kundizzjonijiet li kellu meta ngħata l-maħfra presidenzjali dwar l-involviment tiegħu fil-qil ta’ Daphne Caruana Galizia.
