Il-Prim Ministru Robert Abela meta mistoqsi mill-ġurnalisti, qal li hu lill-Pulizija jħallihom jagħmlu xogħolhom "mingħajr indħil" tkun min tkun il-persuna u qal illi sa issa ma jidhirx li se tittieħed azzjoni kontra l-eks PM Joseph Muscat.
Fakkar li Joseph Muscat ma jokkupa ebda rwol fil-Gvern u kien ta biss opinjoni dwar miżuri li għandhom jittieħdu waqt il-pandemija. "Mhuwiex qed jiġi investigat. Jiena qed insegwi x'inhu jiġri u jekk ikun hemm bżonn jittieħdu deċiżjonijiet, jittieħdu." Abela ċċara li l-eks PM ta biss opinjoni dwar il-miżuri li għandhom jittieħdu fid-dawl tal-pandemija u qatt ma kien konsulent tiegħu jew tal-Gvern.
Fl-aħħar seduti fil-Qorti, fix-xhieda tal-Ispettur Kurt Zahra l-eks Prim Ministru ssemma' diversi drabi fir-rakkont li dan għamel tal-interrogazzjoni ta' Yorgen Fenech. Dan mhux biss kien qal lill-pulizija li l-mandant huwa Keith Schembri u li dan ħallas €80,000 biex Caruana Galizia tinqatel, imma qal ukoll li wara l-assassinju Muscat kien wieħed minn tlieta minn nies konxji li Schembri - allegatament - huwa l-mandant. Meta mistoqsi minn dan is-sit Joseph Muscat ċaħad b'mod assolut li dan huwa minnu.
Fenech kien qal ukoll li ltaqa' mal-eks PM darbtejn - darba f'Kastilja u darba l-Girgenti, fil-festin għal għeluq snin l-istess Muscat.
Dwar l-ilment ta' Carmel Pace dalgħodu, il-PM Abela qal li l-armel għandu ir-review tal-inċident li ħalla l-martu bla ħajja f'idejh u wiegħed li huwa disponibbli għall-familja, fejn ikun hemm bżonn. Huwa ħabbar ukoll li sal-bieraħ stess il-Ministru responsabbli għadda abbozz ta' liġi lill-Kamra tal-Periti filwaqt li se ssir diskussjoni mal-istakeholdeers kollha fir-rigward ta' dawn il-bidliet fil-liġi.
Intant f'attività ftit minuti qabel għadda dawn il-kummenti Abela ħabbar illi s-Suppliment tal-Paga u anke l-vouchers se jiġu estiżi b'xahar.
