F'kummenti ma' dan is-sit Bernard Grech - kandidat propsettiv f'elezzjoni għal Kap Nazzjonalista ġdid, jekk il-Kunsill Ġenerali jagħżel din it-triq nhar is-Sibt - sostna illi kif kiteb fuq il-paġna tiegħu ta' Facebook, hu beda u se jkompli jiltaqa' ma' kulħadd fil-partit biex jisma' x'għandu xi jgħid kulħadd. Dwar storja maħruġa mill-midja tal-Partit Laburista ta' laqgħa bejnu u d-Deputat Jason Azzopardi, Grech qal illi "kieku kelli x'naħbi konna nitkellmu bit-telefon jew immorru għand xulxin, mhux f'kafetterija pubblika."
Hu jispjega kif qed jiltaqa' man-nies kemm dawk li jaqblu u anke ma' dawk li ma jaqblux ma' Delia. "Qed niltaqa' mad-deputati, ma' dawk li jekk issir din l-elezzjoni ikunu kandidati, mal-kunsilliera u mat-tesserati ... iltqajt u se nkompli ma' kulħadd, biex nisma' x'għandu xi jgħid kulħadd. Inkluż Jason Azzopardi li huwa Deputat Nazzjonalista."
Huwa assigura lil dan is-sit illi Azzopardi mhux se jkun qed jimbotrta lilu imma lil ħaddieħor kif diġa', skont Grech, qed juri l-istess Deputat Nazzjonalista.
Ara x'irrapportat il-gazzetta ILLUM nhar il-Ħadd li għadda dwar is-sitt persuni li qed jikkunsidraw bis-serjetà li jitfgħu isimhom.
Ara x'kien qal Bernard Grech f'intervista mal-ILLUM .
Bernard Grech sostna illi qed jiltaqa' ma' kulħadd sabiex jisma' l-opinjoni ta' kulħadd, "qabel nikkunsidra għażla li tfisser tibdil enormi għalija, għall-partit u għall-pajjiż ukoll."
Kif jirrispondi Grech għall-akkuża li tradixxa lill-partit? Għall-argument li Delia seta' tħalla jaħdem sal-elezzjoni ġenerali?
"Jiena personalment xtaqt li jekk ikun opportun dan id-diskors isir wara elezzjoni," beda jispjega l-avukat minn Birżebbuġa. "Imma ċ-ċirkostanzi huma li huma, kulħadd jaf fejn qegħdin - dan li qed isir u li se jsir huwa proċess demokratiku li miegħu qabel l-eżekuttiv, inkluż il-Kap innifsu."
Temm ifakkar illi meta persuna ttellaq ma ttellaqx waħedha u qal illi jekk il-partit jasal f'dak il-punt, ħadd ma jista' jippretendi li xi ħadd ma jtellaqx. "Dan huwa proċess demokratiku, maqbul minn kulħadd inkluż mill-Kap Adrian Delia."