Dalgħodu qam paniku fl-iskola Santa Tereża ta' Birkirkara hekk kif daħlu lura l-iskola grupp ta' studenti li kienu Sqallija. Ġenituri li tkellmu ma' dan is-sit qalu illi fl-iskola qam pandemonju sħiħ b'ħafna ġenituri jipprotestaw kontra l-preżenza ta' dawn l-istudenti.
Jidher iżda - hekk kif kellmu lil dan is-sit sorsi oħrajn - illi dan kien grupp ta' nursery li tela' Sqallija, huwa mqassam f'diversi skejjel, mhux Santa Tereża biss.
Sorsi mill-Gvern qalu illi dawn l-istudenti intalbu jitilqu mill-iskola fil-ħinijet li għaddew, dan filwaqt li reġgħu appellaw għall-kalma u fakkru li m'hemmx bżonn allarm.
Fil-fatt ir-rabja qamet mhux minħabba suspetti ta' mard imma għaliex il-pajjiż li ġejjin minnu l-istudenti fil-fatt huwa l-aktar wieħed li fih hemm każi ta' coronavirus, lil hinn mill-Ażja.
Ilbieraħ stess il-Prim Ministru Taljan, Giuseppe Conte, ħabbar li l-Gvern Taljan qed jestendi għall-Italja kollha r-restrizzjonijiet li fl-aħħar jiem daħlu fis-seħħ għar-reġjun tal-Lombardia u provinċji oħra.
'Imxejna ma' li qalilna d-dipartiment ...'
Sors ieħor li tkellem mal-illum.com.mt qal li dawn l-istudenti kellhom l-approvazzjoni tad-Dipartiment tas-Saħħa Pubblika biex imorru għal din il-ġita.
"Aħna imxejna mal-istruzzjonijiet billi użajna saniitizers u mxejna mal-istruzzjonijiet. Fil-lukanda konna għalina."
Spjegaw kif id-Dipartiment tas-Saħħa Pubblika qallhom li ma kienx hemm bżonn ta kwarantina.
Minkejja dan jidher li f'każi minnhom is-surmastijiet qed iċemplu lill-ġenituri u jgħidulhom biex jiġi jiġbru lit-tfal, anke jekk ma jkollhomx sintomi.
.
