Il-Gozo Channel ħabbar li s-servizz tal-vapur bejn l-Imġarr u ċ-Ċirkewwa se jkun sospiż għal perjodu ta’ tliet sigħat kemm f’Jum il-Milied kif ukoll fl-Ewwel tas-Sena.
Fi stqarrija, il-kumpanija qalet li s-servizz se jieqaf bejn nofsinhar u t-3.00pm f’dawn iż-żewġ festi pubbliċi, sabiex il-ħaddiema li jkunu xogħol ikunu jistgħu jqattgħu l-ħin tal-ikel mal-familji tagħhom.
B’riżultat ta’ dan, numru ta’ vjaġġi skedati mhux se jitħaddmu. Mill-Imġarr lejn iċ-Ċirkewwa, ġew ikkanċellati l-vjaġġi tat-12.00pm, 12.30pm, 12.45pm, 1.00pm, 1.30pm, 2.00pm, 2.15pm u 2.30pm. Min-naħa l-oħra, miċ-Ċirkewwa lejn l-Imġarr mhux se jsiru t-tluq tat-12.15pm, 12.45pm, 1.15pm, 1.30pm, 1.45pm, 2.15pm, 2.45pm u t-3.00pm.
Dan ifisser li l-aħħar vapur li jitlaq mill-Imġarr qabel is-sospensjoni se jkun fil-11.30am, filwaqt li l-aħħar tluq miċ-Ċirkewwa se jsir f’nofsinhar. Is-servizz jerġa’ jibda wara nofsinhar bit-tluq tat-3.00pm mill-Imġarr lejn iċ-Ċirkewwa, segwit minn vjaġġ fid-3.15pm miċ-Ċirkewwa lejn l-Imġarr.
Il-Gozo Channel ħeġġeġ lill-passiġġieri biex jieħdu nota ta’ din is-sospensjoni temporanja u jippjanaw il-vjaġġi tagħhom skont is-sitwazzjoni.
Il-bord tal-kumpanija qal li d-deċiżjoni ttieħdet bħala ġest ta’ apprezzament lejn il-ħaddiema li spiss ikunu obbligati jaħdmu xiftijiet twal, anke f’kundizzjonijiet tat-temp diffiċli. Il-kumpanija rringrazzjat lill-istaff għall-impenn kontinwu tagħhom u għall-fatt li tul is-sena kollha jipprovdu servizz affidabbli lill-pubbliku.
