Is-servizz ta’ ġbir tal-kontenituri tal-iskema Beverage Container Refund Scheme (BCRS) se jiġi estiż madwar Malta u Għawdex, ħabbar il-Ministeru responsabbli mill-indafa pubblika nhar l-Erbgħa.
L-estensjoni tas-servizz se ssir permezz ta’ investiment ta’ madwar €1.2 miljun mill-gvern, li jinkludi vannijiet ġodda manifatturati mill-kumpanija Remautic kif ukoll titjib fis-sistema tal-IT biex il-ġbir tal-kontenituri jsir aktar effiċjenti.
Il-Ministeru spjega li f’Lulju li għadda kienet tnediet inizjattiva pilota li kienet tinvolvi 30 lokalità madwar Malta. Matul tmien xhur, madwar 1.3 miljun kontenitur inġabru minn din l-iskema, fatt li juri l-interess qawwi tal-pubbliku fis-servizz.
Skont l-awtoritajiet, qabel kull vann kien kapaċi jaqdi madwar 40 residenza kuljum. Bl-introduzzjoni tas-sistema l-ġdida, din iċ-ċifra mistennija tiżdied għal madwar 60 residenza kuljum.
Waqt it-tħabbira, il-Ministru għall-Ambjent Miriam Dalli qalet li r-responsabbiltà ambjentali hija ta’ kulħadd, iżda sabiex dan iseħħ huwa importanti li s-sistema tkun aċċessibbli għal kulħadd.
Hija żiedet li l-għan tal-gvern huwa li tinħoloq sistema li taħdem b’mod effettiv u li tilħaq kull rokna tal-pajjiż.
Preżenti għat-tħabbira kien hemm ukoll is-Segretarju Parlamentari għall-Indafa Pubblika Glenn Bedingfield, flimkien mal-CEO ta’ Circular Economy Malta Jason Vella u d-Direttur Ġenerali tad-Diviżjoni tat-Tindif u l-Manutenzjoni Ramon Deguara.
L-iskema tal-BCRS ġiet introdotta fl-2022 u tobbliga lill-produtturi u lill-importaturi tax-xorb iħallsu depożitu addizzjonali ta’ 10 ċenteżmi għal kull kontenitur. Dan id-depożitu jgħaddi għand il-konsumaturi, li jistgħu jirkuprawh meta jirritornaw il-kontenituri vojta f’punti apposta għar-riċiklaġġ.
Skont il-gvern, l-iskema kellha impatt pożittiv sinifikanti billi żiedet b’mod sostanzjali r-rata ta’ riċiklaġġ tal-fliexken f’Malta.
.jpeg)
