L-eks deputat tal-Partit Nazzjonalista u avukat Jason Azzopardi sostna li t-trab abjad li kien intbagħatlu permezz tal-posta fl-2019 ġie kkonfermat bħala kokaina minn testijiet forensiċi – iżda l-Pulizija qatt ma komplew jinvestigaw il-każ minkejja ordni biex jagħmlu dan.
F’post fuq Facebook ippubblikat nhar l-Erbgħa, Azzopardi rrakkonta kif fit-22 ta’ Frar 2019 kien irċieva envelope li kien fih trab abjad suspettuż. Huwa qal li immedjatament informa lill-Pulizija u talab inkjesta maġisterjali, li tnediet l-istess lejl.
Dak iż-żmien, diversi kritiċi kienu akkużawh li ffabbrika l-istorja biex jiġbed l-attenzjoni, iżda Azzopardi issa qal li kiseb informazzjoni uffiċjali – fuq talba tiegħu – li tikkonferma li s-sustanza kienet fil-fatt kokaina. Huwa żied jgħid li l-inkjesta kienet intemmet aktar tard fl-2019, b' konklużjoni li l-Pulizija kellhom ikomplu jinvestigaw il-każ.
“Ma jidher li sar xejn,” kiteb. “Il-Kummissarju tal-Pulizija qatt ma ċempilli biex jistaqsini jekk kellix xi suspett. Għax jien kont inwieġbu: Iva.”
Azzopardi esprima xokk li, kważi sitt snin wara, l-awtoritajiet ma kinux għamlu passi ulterjuri dwar dak li jiddeskrivi bħala tentattiv possibbli biex jiġi mfassal jew ifframjat.
“Ma nistax nemmen. Kważi sitt snin ilu, u xorta waħda l-Pulizija qatt ma ressquli xi mistoqsijiet,” qal. “Dan seta’ kien attentat biex jimplikawni b’mod falz billi jibagħtuli droga.”
Fl-istess post, Azzopardi ħalla ħjiel li jista’ jikxef aktar informazzjoni dwar il-kuntest politiku ta’ dak iż-żmien.
“Għalissa nieqaf hawn,” kiteb. “Immiskhom tistħu.”
