Il-Kummissjoni Nazzjonali għall-Promozzjoni tal-Ugwaljanza (NCPE) esprimiet tħassib serju dwar diskors “misoġinu” li qed jiġi mxandar minn xi personalitajiet pubbliċi, ftit wara li l-podcaster Ricky Caruana ġie kkritikat għall-kummenti tiegħu dwar in-nisa u l-irwol tagħhom fis-soċjetà.
Għalkemm l-istqarrija tal-NCPE ma ssemmiex lil Caruana b’ismu, din waslet wara li l-Malta Women’s Lobby ċanfru lill-PBS talli taw pjattaforma lil Caruana minkejja li, skont huma, esprima “fehmiet foloz, medjevali u apertament misogini” fuq il-midja soċjali.
Kummenti kontroversjali dwa l-irwol tan-nisa
Il-kontroversja nibtet minn filmat fuq Facebook fejn Caruana ta l-opinjoni tiegħu dwar il-kwistjoni nazzjonali tal-fertilità. Hu sostna li jekk ġenitur wieħed irid jibqa’ d-dar biex jieħu ħsieb lit-tfal, “aktarx għandu jkun il-mara,” billi hi “naturali aktar marbuta mat-tarbija”.
Hu kompla billi argumenta li l-fatt li rġiel u nisa jaħdmu flimkien iwassal għal affarijiet barra ż-żwieġ, u għalhekk hu “kontra” li rġiel u nisa jaħdmu fl-istess ambjent, għax “is-sess jindaħal”.
Caruana wkoll irrefera għall-letteratura dwar fastidju sesswali, fejn sostna li ħafna każijiet jiġu rrappurtati “bħala vendetta personali” aktar milli abbuż veru, kumment li qajjem rabja fost diversi gruppi tan-nisa.
L-istqarrija tal-NCPE
Fl-istqarrija tagħha, l-NCPE qalet li huwa “inaċċettabbli li xi ħadd jippromwovi l-valur imnaqqas tan-nisa jew isaħħaħ stereotipi li jkomplu jżidu l-inugwaljanza soċjali”. Il-Kummissjoni saħqet li dan hu “aktar u aktar inkwetanti” meta jsir minn persuni influwenti jew f’karigi pubbliċi.
Filwaqt li rrikonoxxiet li d-differenza ta’ opinjonijiet hi parti normali mid-diskors pubbliku, l-NCPE insistiet li kull espressjoni għandha ssir “b’rispett lejn id-dinjità umana”.
“Il-libertà tal-espressjoni ma tagħtix liċenzja biex jinxterdu narrattivi misoginisti,” tenniet il-Kummissjoni, filwaqt li appellat lill-awtoritajiet kompetenti biex jiżguraw li dawk f’pożizzjonijiet pubbliċi jżommu standards għoljin u ma jikkawżawx ħsara soċjali.
