Il-konferenza internazzjonali SiGMA tiftaħ illum wara nofsinhar fil-Mediterranean Maritime Hub (MMH), fejn diġà qed jirrapurtaw xi dewmien fit-traffiku fl-inħawi.
Filgħodu, sigħat qabel il-ftuħ uffiċjali, il-karozzi li għaddew miż-żona tal-Aldo Moro esperjenzaw xi tnaqqis fil-fluss, iżda l-konġestjoni kienet inqas meta mqabbla ma’ snin preċedenti. Xorta waħda, wieħed għad irid jara kif se tmur is-sitwazzjoni aktar tard wara nofsinhar meta l-attendenza mistennija tkun ikbar.
Din is-sena, bejn l-1 u t-3 ta’ Settembru, il-konferenza se tattira aktar minn 15,000 persuna, skont Transport Malta, numru inqas meta mqabbel mal-25,000 li attendew is-sena l-oħra. Minkejja dan, l-avveniment xorta waħda jibqa’ wieħed mill-akbar laqgħat internazzjonali li jsiru fil-pajjiż, b’eluf ta’ nies minn madwar id-dinja u impatt ekonomiku ta’ miljuni ta’ ewro.
Transport Malta ħabbret pjan speċjali biex timmaniġġja t-traffiku madwar il-MMH. Uffiċjali se jkunu qed jagħmlu pattugliamenti regolari, bl-użu ta’ muturi u drones. Il-miżuri huma mfassla biex jagħtu l-aħjar użu mill-ispazju disponibbli fil-viċinanzi tal-post.
Skont il-pjan, l-utenti ta’ ride-hailing u cabs privati se jkollhom pick-up u drop-off zone apposta wara l-pont ħdejn il-flyover tal-Marsa. Karozzi b’xufier se jitwaqqfu f’żona viċin iċ-Ċimiterju tal-Addolorata, filwaqt li l-istaff tal-konferenza se jingħata spazji ta’ parkeġġ aktar viċin tal-entratura. Coaches u minibuses se jitwaqqfu tul Triq tat-Tromba, li jfisser mixja ta’ madwar seba’ minuti lejn il-MMH. Min-naħa tagħhom, it-taxis bojod se jwaqqfu l-passiġġieri quddiem l-uffiċċju tal-passaporti ta’ Identità.
Is-sena li għaddiet, eluf ta’ sewwieqa nqabdu fi traffiku qawwi meta l-attendenza qabżet kull stennija. Din id-darba, bl-attendenza mistennija aktar baxxa u bil-pjan ġdid ta’ Transport Malta, l-awtoritajiet qed jittamaw li l-impatt fuq il-komunità u fuq il-fluss tat-traffiku jkun aktar ikkontrollat.
.png)
