Il-Fondazzjoni Daphne Caruana Galizia appellat lill-Unjoni Ewropea u lill-istati membri tagħha biex jintervjenu immedjatament sabiex jieqaf il-qtil ta’ ġurnalisti minn Israel f’Gaża.
F’ħarġa għall-istampa, il-Fondazzjoni qalet: “Inkomplu nsejħu lil dawn l-istati biex jieħdu azzjoni biex iwaqqfu l-qtil, billi jwaqqfu l-provvista ta’ armi u lill-istati membri tal-UE biex jissospendu l-ftehim kummerċjali bejn l-UE u Israel. Il-kummerċ ma jistax jiġi qabel il-ħajja tal-bniedem jew il-libertà tal-istampa.”
L-appell sar wara l-qtil ta’ ħames ħaddiema tal-midja ta’ Al Jazeera – ir-reġista Anas al-Sharif, il-ġurnalist Mohammed Qreiqeh, u l-operaturi tal-kamera Ibrahim Zaher, Mohammed Noufal u Moamen Aliwa – meta t-tinda tagħhom qrib l-Isptar Al-Shifa fil-Belt ta’ Gaża kienet immirata minn attakk Iżraelit il-Ħadd li għadda.
Skont Reuters, il-militar Iżraelit ammetta r-responsabbiltà tal-attakk, u sostna li al-Sharif kien kap ta’ ċellula militanti ta’ Hamas u li kien responsabbli għall-ippjanar ta’ attakki bir-rokits kontra ċivili Iżraeliti u truppi tal-IDF. Il-militar qal li bbaża din l-informazzjoni fuq dokumenti miġbura f’Gaża, iżda dawn ma ġewx ippubblikati.
Il-Fondazzjoni rrimarkat li pajjiżi li jipprovdu l-armi – fosthom il-Ġermanja, ir-Renju Unit u l-Istati Uniti, membri tal-Media Freedom Coalition – għandhom responsabbiltà akbar li jiżguraw ir-rispett tad-drittijiet tal-bniedem u li l-ġustizzja għal delitti tal-gwerra tintlaħaq.
Dawn il-ħames każijiet huma l-aħħar f’serje twila ta’ qtil ta’ ġurnalisti u ħaddiema tal-midja fil-Gaża, ix-Xatt tal-Punent, Israel u l-Libanu. Skont il-Committee to Protect Journalists (CPJ), mill-7 ta’ Ottubru 2023 ġew dokumentati l-qtil ta’ 186 ġurnalist u ħaddiem tal-midja – 178 minnhom Palestinjani maqtula minn Israel.
Il-CPJ kkonkluda li 20 minn dawn il-vittmi kienu mmirati u maqtula direttament mill-forzi Iżraeliti, u kkategorizza dawn il-qtil bħala omiċidji. L-organizzazzjoni qed tinvestiga mill-inqas 20 każ ieħor li juru sinjali ta’ mira intenzjonata.
