L-istokk ta’ vetturi bil-mutur b’liċenzja attiva f’Malta kompla jiżdied fit-tieni kwart tal-2025, u fi tmiem Ġunju laħaq l-450,794 vettura. Dan ifisser żieda ta’ 3,339 vettura meta mqabbel mat-tliet xhur ta’ qabel, b’medja ta’ 37 vettura ġdida kuljum.
Skont l-aħħar statistika ppubblikata, 73.8% tal-vetturi kienu karrozzi tal-passiġġieri, filwaqt li 14.3% kienu vetturi kummerċjali jew agrikoli. 11.3% oħra kienu jinkludu muturi u scooters megħjuna b’enerġija elettrika, ATVs u muturi b’erba’ roti. Ix-xarabanks u l-minibuses baqgħu f’livelli baxxi, b’anqas minn 1% tas-suq.
Matul l-istess perjodu, ġew liċenzjati 7,917-il vettura ġdida, fosthom 4,737 kienu karrozzi tal-passiġġieri — li jirrappreżentaw 59.8% tat-total. 1,989 vettura oħra kienu muturi u roti megħjuna b’enerġija elettrika (25.1%). Interessanti li aktar minn nofs dawn il-vetturi kienu ‘ġodda’ (58.7%), filwaqt li 41.3% kienu użati.
Medja ta’ 87 vettura kuljum ingħataw liċenzja ġdida fit-tieni kwart tas-sena.
Madankollu, kien hemm ukoll moviment sostanzjali ta’ vetturi li tneħħew mit-toroq b’xi forma ta’ restrizzjoni. Bejn April u Ġunju 2025, 9,366 vettura ġew imneħħija temporanjament jew permanenti. Minn dawn: 39.4% ġew iggaraxxjati, 29.6% ġew mibjugħin mill-ġdid, waqt li 29.0% ġew skreppjati.
Fl-istess perjodu, 4,816-il vettura reġgħu ġew irreġistrati wara li tneħħew mir-restrizzjonijiet, l-aktar wara li nbiegħu jew ġew meħlusa mill-ġdid.
L-istatistika turi wkoll li, sal-aħħar ta’ Ġunju, 262,047 vettura kienu jaħdmu b’magna petrol (58.1%), filwaqt li 34.6% kienu bil-magna diesel (155,846 vettura).
L-interess fil-vetturi li jaħdmu bl-elettriku jew ibridi komplew jiżdiedu, bi 19,493 vettura f’din il-kategorija — 4.3% tal-istokk nazzjonali. Il-vetturi plug-in hybrid bid-diesel raw żieda ta’ 7.2%, waqt li dawk fully electric żdiedu b’6%, u mild hybrid bil-petrol b’5.1% meta mqabbla mal-ewwel kwart tas-sena.
Dan ir-rapport juri b’mod ċar it-trend ta’ tkabbir u diversifikazzjoni fil-flotta tal-vetturi f’Malta, b’aktar għażliet sostenibbli jibdew jieħdu sehem gradwali fis-suq.
