Il-prezzijiet tal-produtturi industrijali f’Malta baqgħu stabbli f’Ġunju 2025 meta mqabbla mal-istess xahar tas-sena li għaddiet, skont statistika ppubblikata mill-Uffiċċju Nazzjonali tal-Istatistika (NSO). Madankollu, ġew irrappurtati xi moviment varjat bejn is-swieq domestiċi u dawk barranin, kif ukoll bejn il-kategoriji differenti tal-oġġetti industrijali.
Filwaqt li l-Indiċi Totali tal-Prezzijiet tal-Produtturi Industrijali (IPPI) ma wera l-ebda tibdil fuq sena, kien hemm differenzi notevoli fi ħdan il-komponenti tiegħu. Il-prezz tal-oġġetti intermedji niżel bi 2.2%, filwaqt li kien hemm żieda taʼ 1.7% fil-prezzijiet tal-oġġetti tal-konsum u taʼ 0.8% f’dawk tal-oġġetti kapitali. Il-prezzijiet fis-settur tal-enerġija baqgħu l-istess.
Is-suq domestiku rreġistra żieda ġenerali ta’ 0.9% fil-prezzijiet tal-produtturi industrijali. Din iż-żieda kienet imħaddma minn tkabbir fil-prezzijiet tal-oġġetti tal-konsum (3.0%), l-oġġetti intermedji (0.7%) u l-oġġetti kapitali (0.3%).
Min-naħa l-oħra, il-prezzijiet tal-produtturi industrijali mmirati għas-swieq barranin naqsu b’1.0%. L-aktar tnaqqis qawwi kien irreġistrat fl-esportazzjoni lejn żoni mhux tal-Euro, b’nuqqas ta’ 2.6%. Għall-kuntrarju, l-esportazzjoni lejn iż-Żona tal-Euro rat żieda ta’ 1.0%.
Meta mqabbel ma’ Mejju 2025, l-IPPI f’Ġunju 2025 żdied b’0.1%. Żidiet kienu osservati fil-prezzijiet tal-oġġetti intermedji (0.5%) u tal-oġġetti kapitali (0.1%), waqt li l-prezz tal-oġġetti tal-konsum niżel b’0.3%. Il-prezzijiet fis-settur tal-enerġija baqgħu stabbli.
Il-prezzijiet għas-suq domestiku baqgħu l-istess bħal f’Mejju, iżda dawk mhux domestiċi żdiedu b’0.2%. Ż-żieda kienet reġistrata kemm fl-esportazzjoni lejn iż-Żona tal-Euro (0.3%) kif ukoll lejn żoni mhux tal-Euro (0.2%).
.jpg)
