Moviment Graffitti esprimiet l-appoġġ tagħha għall-introduzzjoni tal-ewtanasja volontarja, filwaqt li qalet li kull individwu għandu jkollu d-dritt jagħżel jekk itemmx ħajtu quddiem mard li ma jfiqx u tbatija kbira.
Fi stqarrija pubblika, l-NGO saħqet li, għalkemm temmen fil-libertà personali, tifhem ukoll li l-kwistjoni hi waħda kumplessa u trid tkun immaniġġjata b’attenzjoni. Il-gvern nieda dokument ta’ konsultazzjoni dwar qafas għall-ewtanasja volontarja aktar kmieni dan ix-xahar, li jispeċifika ċar li l-għażla se tkun limitata għal pazjenti b’mard terminali, li jkunu ta’ 18-il sena ’l fuq, residenti f’Malta għal mill-inqas sena, u li jkunu għamlu t-talba huma stess.
Il-proposta tipprojbixxi wkoll lill-professjonisti mediċi milli jissuġġerixxu din l-għażla lill-pazjenti. Barra minn hekk, dawk li jbatu minn kundizzjonijiet mentali, diżabilità, jew mard relatat mal-età bħad-dimensja, ma jkunux eliġibbli.
Moviment Graffitti qalet li hija konxja tar-riskji potenzjali, bħall-pressjoni indiretta fuq nies vulnerabbli jew il-periklu li xi wħud jagħżlu l-ewtanasja minħabba nuqqas ta’ kura xierqa. Għaldaqstant, l-għaqda qed tinsisti fuq l-importanza li l-leġiżlazzjoni tkun akkumpanjata minn sistema regolatorja soda u istituzzjonijiet effettivi.
“Jeħtieġ ukoll li jkun hemm aċċess wiesa’ u adegwat għal kura paljattiva u servizzi ta’ sostenn komunitarju,” żiedet tgħid l-NGO, “biex nassiguraw li d-deċiżjoni tibqa’ waħda tassew volontarja, u mhux riżultat ta’ nuqqasijiet fis-sistema tas-saħħa jew soċjali.”
Moviment Graffitti temmet billi qalet li l-istat għandu jirrispetta d-diversità ta’ opinjonijiet dwar il-ħajja u l-mewt, u ma jistax jimponi twemmin wieħed fuq id-deċiżjonijiet personali ta’ oħrajn, speċjalment meta dawn ikunu qed jiffaċċjaw realtajiet diffiċli u bla tama.
.png)
