L-Ambaxxata Maltija li tinsab f'Tripli ċaħdet b’mod ċar l-allegazzjonijiet li kienu qed jissuġġerixxu li l-Prim Ministru Libjan, Abdul Hamid Dbeibeh, ħarab lejn Malta.
Fi stqarrija fuq Facebook, l-ambaxxata qalet li wara li kkonsultat mal-awtoritajiet kompetenti f'Malta, irriżulta li l-ebda uffiċjal Libjan ma daħal f’Malta b’permess diplomatiku f’dawn l-aħħar ġranet.
“Dawn it-tip ta’ informazzjoni żbaljata huma ta’ ħsara u ma jagħmlu ġid lil ħadd. Huwa tal-mistħija li jinxtered dak li mhuwiex veru, speċjalment meta dan jhedded ir-relazzjonijiet dejjem tajbin bejn il-poplu Malti u dak Libjan,” żiedet tgħid l-ambaxxata.
Dan kollu seħħ fost tensjonijiet dejjem jiżdiedu fil-Libja, fejn mijiet ta’ dimostranti ħarġu fit-toroq biex jitolbu r-riżenja tal-Gvern immexxi minn Dbeibeh. Skont rapporti, uffiċjal tas-sigurtà tilef ħajtu meta grupp ta’ dimostranti ppruvaw jidħlu bil-forza fl-uffiċċju tal-Prim Ministru.
Intant, mill-inqas tliet ministri rriżenjaw bħala solidarjetà mal-protesti.
Il-Ministru għall-Affarijiet Barranin Malti, Ian Borg, ukoll esprima t-tħassib ta’ Malta dwar is-sitwazzjoni fil-Libja. Huwa qal li Malta qed issegwi mill-qrib dak li qed jiġri u saħaq fuq l-importanza tal-kalma u d-djalogu għall-ġid tal-poplu Libjan.
Huwa kkonferma wkoll li l-maġġoranza taċ-ċittadini Maltin ġew evakwati, iżda Malta tibqa’ lesta li toffri għajnuna fejn meħtieġ u tinsab f’kuntatt kontinwu mal-imsieħba tagħha.
