Il-Gvern ta’ Malta nieda konsultazzjoni pubblika dwar il-mewt assisitita, li tkun permessa biss f’każijiet ta’ adulti mentali kompetenti li jkunu qed isofru minn kundizzjoni terminali li mistennija twassal għall-mewt fi żmien sitt xhur. Il-proposta ma tapplikax għal persuni b'diżabbiltà, kundizzjonijiet ta’ saħħa mentali, demenza jew izolament soċjali.
Skont id-dokument ta’ konsultazzjoni, il-pazjenti jridu jkunu 'l fuq minn 18-il sena, residenti f’Malta għal mill-inqas 12-il xahar u jkunu għamlu t-talba huma stess. Tabib ma jistax jissuġġerixxi din l-għażla lill-pazjent.
Il-proċess propost jinkludi valutazzjoni minn tliet professjonisti mediċi—speċjalista, psikjatra u tabib verifikatur—li kollha jridu jikkonfermaw li t-talba hija volontarja u tissodisfa l-kriterji kollha. Il-każ imbagħad jintbagħat quddiem bord indipendenti li jinkludi esperti mediċi u legali, u li jiżgura l-konformità u jidentifika każijiet ta’ abbuż.
L-awtorizzazzjoni finali tingħata minn eks-Imħallef wara perjodu ta’ riflessjoni. Il-pazjenti għandhom id-dritt li jirtiraw it-talba fi kwalunkwe mument, u huma biss jistgħu jamministraw il-medikazzjoni meħtieġa. Il-professjonisti fil-qasam tas-saħħa jkunu jistgħu jirrifjutaw li jipparteċipaw fuq bażi ta’ kunsjenza, iżda jkollhom jirreferu lill-pazjent lil tabib ieħor.
Il-liġi se tinkludi pieni kriminali kontra kull min jipprova jċaħħad jew jagħfas fuq xi ħadd biex jagħmel talba għal mewt assistita.
Il-konsultazzjoni qed tistieden ukoll kummenti dwar l-idea ta’ "living will" — dokument li jippermetti lil individwi mentali kompetenti jirreġistraw preferenzi tagħhom dwar kura f’każijiet ta’ inkonxjenza fil-futur, permezz tas-sistema MyHealth. Dawn id-dikjarazzjonijiet jistgħu jinbidlu fi kwalunkwe ħin.
Ser isiru tliet diskussjonijiet pubbliċi: f’Fgura fil-16 ta’ Mejju, f’Għawdex fil-30 ta’ Mejju, u f’Mosta fit-13 ta’ Ġunju.
Il-Kelliem Parlamentari Rebecca Buttigieg saħqet li din l-inizjattiva hija frott ħidma teknika u serja, u toffri bażi matura u infurmata għad-diskussjoni nazzjonali. "Din il-konsultazzjoni hija pass kruċjali lejn approċċ serju u uman għall-krudeltà tat-tbatija li ma tistax titfejjaq," qalet Buttigieg.
