Il-Gvern ikkonferma li l-art u l-proprjetajiet tal-istat li ġew trasferiti lill-kunsilli lokali madwar Malta u Għawdex se jkollhom limitu fuq il-kirja fejn dan ma jistax jitla’ ’l fuq minn €500 kull sit.
Dan ġie żvelat f’risposta parlamentari mill-Ministru għall-Artijiet u l-Implimentazzjoni tal-Programm Elettorali, Stefan Zrinzo Azzopardi, għal mistoqsija parlamentari sottomessa mix-Shadow Minister għall-Kwalità tal-Ħajja u l-Gvern Lokali.
Il-mistoqsija parlamentari talbet lista dettaljata tal-proprjetajiet kollha tal-Gvern li kienu mogħtija lill-kunsilli lokali. Il-Ministru Zrinzo Azzopardi wieġeb b’lista li toffri veduta dwar kemm-il sit ingħata f’kull lokalità.
Filwaqt li d-dettalji sħaħ tas-siti ma ġewx mogħtija, il-Ministru kkonferma li kwalunkwe ftehim ta’ kiri ġdid jew anke emendat se jara li s-sit ma jkunx jiswa aktar minn €500. Din il-miżura tidher li hija mfassla biex tiżgura li l-kunsilli lokali jistgħu joperaw, speċjalment peress li dawn il-kunsilli jmexxu faċilitajiet u spazji pubbliċi taħt il-ġurisdizzjoni tagħhom.
Id-devoluzzjoni tal-proprjetà tal-Gvern lill-kunsilli lokali hija prassi twila, li tippermetti lill-muniċipalitajiet jużaw siti proprjetarji tal-istat għall-benefiċċju pubbliku, inklużi ċentri komunitarji, spazji rikreattivi, u uffiċċji amministrattivi.
Il-Mellieħa bl-akbar ammont ta’ proprjetajiet
Il-Mellieħa għandha l-ogħla numru ta’ proprjetajiet tal-Gvern devoluti lill-Kunsill Lokali, b’total ta’ 13-il sit. Din kienet l-unika lokalità li kellha aktar minn tmien siti.
Il-Birgu, Ħad-Dingli, u x-Xagħra kollha għandhom seba’ siti kull wieħed. Dan filwaqt li Birkirkara, l-Imġarr, il-Mosta, ir-Rabat (Għawdex), iż-Żurrieq, ix-Xewkija u Santa Luċija għandhom sitt siti.
Il-lokalitajiet l-oħra kollha għandhom bejn sit wieħed jew erbgħa, bl-eċċezzjoni tal-Kalkara, l-Isla, u l-Għargħur, li għandhom ħamsa.
Fost il-lokalitajiet li għandhom erba’ siti nsibu Bormla, il-Fgura, in-Naxxar, u San Ġiljan. Il-maġġoranza tal-lokalitajiet għandhom tliet siti. Fost is-16-il lokalità li għandhom tliet siti nsibu Ħal Għaxaq, l-Imdina, San Ġwann, u l-Belt Valletta.
15-il lokalità għandha żewġ siti, u din il-lista tinkludi lokalitajiet bħar-Rabat, Ħal Qormi, Ħal Tarxien, Marsaxlokk u Ħ’Attard.
Fl-aħħar insibu 12-il lokalità, li b’kollox għandhom sit wieħed. Fost dawn insibu l-Gżira, l-Iklin, Wied il-Għajn u l-Ħamrun.
Video is unavailable at this time.
