"Il-maratona tal-Istrina li saret fi tmiem il-ġimgħa li għaddiet b’risq dawk li għandhom bżonn għajnuna minħabba ċirkostanzi ta’ mard reġgħet uriet il-qalb ġeneruża tal-Maltin u l-Għawdxin. Mil-lat ta’ għoti ta’ demm wieħed jista’ jgħid ukoll li fil-jiem li għaddew id-donazzjonijiet tad-demm ma kinux nieqsa." Hekk sostna fi stqarrija Is-Servizz Nazzjonali tat-Trasfużjoni tad-Demm li fakkar illi dan ser iwassal biex minkejja l-ħafna diffikultajiet u sfidi, "din is-sena se nispiċċawha b’togħma tajba."
Is-Servizz Nazzjonali tat-Trasfużjon tad-Demm għalhekk - filwaqt li awgura s-Sena t-Tajba lil kulħadd - reġa' ħeġġeġ lill-pubbliku biex jagħti demm bħala Strina lil tant morda li f’dawn il-jiem ta’ festi qed jiġu rikoverati fl-isptarijiet ta’ Malta u Għawdex.
Għaldaqstant l-għoti tad-demm bħala Strina, fil-jiem li ġejjin jista’ jsir:
1 - Iċ-Ċentru tal-Għoti tad-Demm ta’ Gwardamanġa li jiftaħ kuljum - inkluż festi pubbliċi u jiem ta’ vaganzi - mit-8:00am sas-6:00pm.
*b’eċċezzjoni, jekk ir-riserva tad-demm tkun tippermetti, nhar l-Ewwel tas-Sena, Iċ-Ċentru tal-Għoti tad-Demm ta’ G’Manġa jagħlaq fis-1:00pm minflok fis-6:00pm.
2 - Fil-mobile blood donation unit li nhar il-Ħadd 3 ta’ Jannar mit-8:30am sas-1:00pm ser ikun fil-Pjazza ta’ quddiem il-Knisja Arċipretali tal-Mellieħa.
3 - Fil-Berġa tax-Xewkija li nhar Il-Ħadd 3 ta’ Jannar ser tkun disponibbli għad-donazzjonijiet tad-demm mit-8:00am sas-1:00pm.
Tinsewx illi biex tagħtu d-demm jeħtieġ li tieħdu l-Karta tal-Identità, jew il-Liċenzja tas-Sewqan jew Passaport Malti.
N.B: Kulmin se jagħmel is-swab test tal-coronavirus jew qed jistenna r-riżultat tiegħu ma jkunx jista’ jagħti demm sakemm joħroġ r-riżultat li hu negattiv għall-virus.
