Il-popolazzjoni ta’ Malta laħqet 574,250 ruħ sal-aħħar tal-2024, żieda ta’ 1.9% fuq is-sena ta’ qabel.
Id-data ġiet ippubblikata mill-Uffiċċju Nazzjonali tal-Istatistika (NSO) qabel il-Jum Dinji tal-Popolazzjoni.
Il-maġġoranza ta’ din iż-żieda ġiet attribwita mal-migrazzjoni, b’10,614-il persuna aktar jidħlu fil-pajjiż milli joħorġu minnu. B’mod partikolari, kważi 77% tat-total tal-migrazzjoni kienu ċittadini minn barra l-UE. Għalkemm l-immigrazzjoni naqset meta mqabbla mal-2023, l-emigrazzjoni żdiedet, li rriżultat f’tnaqqis ta’ kważi 50% fit-total tal-migrazzjoni.
L-irġiel kienu ftit iktar minn nofs il-popolazzjoni b’53.1%, u ffurmaw proporzjon ikbar (57.7%) ta’ dawk li daħlu fil-pajjiż.
It-tkabbir naturali tal-popolazzjoni, jiġifieri d-differenza bejn twelid u mwiet, naqas b’mod sinifikanti. It-twelid naqas ftit, filwaqt li l-imwiet żdiedu, u dan wassal għal żieda naturali ta’ biss 193 persuna — tnaqqis ta’ aktar minn 55% mis-sena ta’ qabel.
It-tfal taħt it-18-il sena kienu jammontaw għal 14.5% tal-popolazzjoni, filwaqt li 18.4% kienu ta’ 65 sena jew iktar. In-nisa kienu iktar mill-irġiel fil-gruppi ta’ età akbar, b’mod partikolari fost dawk ta’ aktar minn 85 sena, fejn kien hemm kważi darbtejn aktar nisa milli rġiel.
Iċ-ċifri dwar iċ-ċittadinanza juru li 70.6% tar-residenti kienu Maltin, filwaqt li 29.4% kienu ċittadini barranin. Ir-residenti barranin kienu prinċipalment fil-grupp ta’ eta' bejn il-20 u l-49 sena, li jindika popolazzjoni iżgħar u b'hekk ta’ età tax-xogħol.
Ġeografikament, iż-żoni tal-Port il-Kbir tat-Tramuntana u tat-Tramuntana kellhom l-akbar proporzjon ta’ ċittadini barranin. Bil-kontra, iż-żoni tal-Punent, tal-Port il-Kbir tan-Nofsinhar u tax-Xlokk baqgħu primarjament popolati minn Maltin.
Id-densita' tal-popolazzjoni kienet l-ogħla f’Tas-Sliema, il-Pietà u l-Isla, kollha b’aktar minn 14,000 resident għal kull kilometru kwadru. Bħala kuntrast, l-inqas densita' ta’ popolazzjoni kienet f’Għasri, San Lawrenz u l-Imdina.
