Residenti Beltin jgħidu l-affarijiet marru "għall-agħar" taħt il-kunsill il-ġdid

Numru ta' Residenti Beltin ikkonċernati jessprimu d-diżappunt tagħhom fil-Kunsill Lokali tal-Belt, jgħidu li l-affarijiet maru "għall-agħar" taħt il-kunsill il-ġdid fil-qasam tal-indafa.

Ir-residenti jappellaw lis-sindku u lil kunsill lokali, fejn qalu li s-stat kurrenti tal-affarijiet mhuwiex wieħed ideali. Fost il-problemi msemmija hemm il-ġbir ta' skart, l-indafa tat-toroq u manutenzzjoni ġenerali tal-belt, affarijiet li qed ikollhom "effett negattiv fuq il-kwalita' tal-ħajja tal-komunita' tagħna."

L-istat kurrenti tal-indafa fil-Belt (Ritratt: Facebook/Residenti Beltin)

Fuq il-midja soċjali tal-istess grupp, hemm ħafna ilmenti ta' skart li ma nġabarx f'ċertu toroq tal-Belt. Ilment ieħor li jqajmu huwa kontra l-istorbju fil-Belt.

"Żona residenzjali saret żona ta’ xalar kważi kull jum... F’lokalitajiet oħra ssib kunsilli li jiddefendu l-interessi tar-residenti... U fil-Belt Valletta?" tgħid waħda mill-posts tagħhom fuq il-paġna ta' Facebook.

Fl-istqarrija, huma jissuġġerixxu li d-dekasteru tal-indafa fil-kunsill jingħata lil xi ħadd ieħor, hekk kif ilu għand l-istess persuna għall-aħħar sitt snin. Skonthom, dan it-tibdil jista joffri perspettiva ġdida ta' kunsillier differenti u riżultati aħjar.

L-istess grupp jirriferi għall-kunsill bħala "siket", il-pulizija bħala "inattiva", l-awtoritajiet bħala "kompliċi" u l-gvern bħala "jnaqqas l-ispejjeż".