Id-djoċesi ta' Għawdex b'linji gwida dettaljati dwar il-festi titulari

Id-Djoċesi ta' Għawdex ippubblikat direttivi dwar kif jistgħu jkunu ċċelebrata l-festi din is-sena, dejjem jekk l-awtoritajiet tas-saħħa jagħtu l-permess li jistgħu jsiru ċelebrazzjonijiet fil-knejjes u dejjem jekk ikun jista' jsir pellegrinaġġ bil-vara titulari skont l-istruzzjonijiet tal-awtoritajiet tal-massa u anke tal-Konferenza Episkopali Maltija.

Dawn huma d-direttivi:

Jiem ta' tħejjija

• Fejn is-soltu ssir kwindiċina din tibda ħmistax-il ġurnata qabel jum il-festa u tkun tinkludi wkoll it-tlett ijiem tat-tridu u lejlet il-festa
• Fejn is-soltu ssir novena din tibda disat ijiem qabel jum il-festa u tkun tinkludi wkoll it-tlett ijiem tat-tridu u lejlet il-festa
• F'każijiet oħra, il-preparazzjoni tibda sitt ijiem qabel il-festa u tkun tinkludi wkoll it-tlett ijiem tat-tridu u lejlet il-festa

Iċ-ċelebrazzjonijiet fi żmien it-tħejjija

• Il-Quddiesa, bl-omelija, bis-sehem ta' konċelebranti, kif ukoll bis-sehem tal-organista, kantur/solista u xi koristi. Il-qari jinqara mill-organista jew il-kantur
• Espożizzjoni tas-Sagrament
• Talb tal-Liturġija tas-Sigħat
• Talba tar-Rużarju, Kurunella jew talb ieħor
• Katekeżi.

Jum il-festa

• Il-Quddiesa prinċipali bl-omelija. Mal-organista jistgħu jingħaqdu biss xi strumenti mużikali oħra imma mhux aktar minn sitta.
• Quddies ieħor isir bis-sehem tal-organista u solista.
• Espożizzjoni tas-Sagrament
• Talb tal-Liturġija tas-Sigħat
• Talba tar-Rużarju, Kurunella jew talb ieħor
• Katekeżi

Il-pellegrinaġġ

• Jista' jsir biss jekk jingħata permess mill-awtoritajiet tas-saħħa
• Isir filgħaxija u b'mod sempliċi u devot
• Jgħaddi mit-toroq li minnhom is-soltu tgħaddi l-purċissjoni
• Jimxi f'din l-ordni: L-istatwa u warajha l-kappillan, il-kleru, min se jgħin fit-talb u fl-aħħar nett il-poplu.

Tiżjin fil-knisja

• Jintrama d-damask tal-erba' pilastri ta' madwar l-artal u l-kor
• Jintrama l-artal maġġur, iż-żona tal-kor u t-tużell
• Jitniżżlu biss il-linef tal-kappelluni prinċipali

L-istatwa titulari

• Tintrama l-istatwa titulari
• Fejn hemm mant jista' jintrama
• Ma jsirx ħruġ min-niċċa

Armar ta' barra

• Jintrama u jinxtgħel xi dawl mal-faċċata tal-knisja
• Jintramaw u jinxtgħelu xi festuni tad-dawl fil-pjazza ta' quddiem il-knisja jew fuq iz-zuntier
• Jintramaw sett arbli bil-bandalori fil-pjazza ta' quddiem il-knisja jew fuq iz-zuntier

Nar

• Ħruq tan-nar isir skont kif imħabbar mill-Gvern aktar kmieni din il-ġimgħa
• Ma għandux jinxtara logħob tan-nar. 

Festi esterni

• Għal din is-sena ma jsir xejn, lanqas daqq ta' banda jew permezz ta' sistema ta' sound.