Xehdu tliet vittmi ma’ tliet banek differenti, fejn l-ewwel vittma mal-Banif plc stqarret li fit-3 ta’ Novembru 2025 rċiviet messaġġ li xi ħadd daħal fuq il-kont tagħha u għafset link li ntbagħat lilha. Dak il-ħin stess, l-istess numru ċemplilha fejn kellmitha mara li allegatament jisimha ‘Rachel’ u staqsietha jekk hijiex tipprova tagħmel xi transazzjonijiet mill-kont tagħha, fejn il-vittma rrispondiet fin-negattiv.
Il-link ħaditha fuq sit li jien jixbah eżattament l-applikazzjoni tal-Banif, fejn hi għafset biex tikkanċella ċertu transazzjonijiet u ssussgwentement, inqatgħu madwar €20,000.
“Dak il-ħin xokk kbir u naqsuli €20,000”, qalet il-vittma.
Vittma mal-APS Bank sostniet kif irċeviet messaġġ li qed jippruvaw jittieħdu xi flus mill-kont tagħha. Hi stqarret li rċeviet telefonata li ħasbet kienet ġejja mill-bank, u għalhekk antiċipat li s-sitwazzjoni kienet waħda kemxejn urġenti. Il-vittma qalet li tteħdulha madwar €4,900.
“Dehret ġenwina immens għalija, jien kont naħdem il-bank u għandi idea sew. Kien hemm ħafna żbalji fi kliemha, imma jien ħassejt għaliha minħabba li nstemgħet għadha żgħira u għalhekk ikkumpatejtha”, qalet il-vittma filwaqt li stqarret li ħassitha stupida u redikolata.
Il-vittma spiċċat ix-xhieda tagħha fejn irrimarkat li l-fatt li l-persuna tkellmet bil-Malta kienet mekkaniżmu qarrieqa, u lanqas setgħet temmen li “ħa tieħu flusi, flus it-tfal tiegħi”.
Waqt is-smigħ tat-talba għall-ħelsien mill-arrest, xehdet iz-zija ta’ omm Tammy, li offriet li Caruana tirrisjedi magħha fl-eventwalita li jingħata l-ħelsien mill-arrest. Il-prosekuzzjoni oġġezzjonat għal dan u argumentat li peress li Tammy diġà kellha problemi serji mal-familja tagħha, kien hemm biża’ reali li hija tista’ titkeċċa mid-dar, u b’hekk tispiċċa tikser il-kundizzjonijiet tal-arrest impost fuqha.
Dwar il-meritu tar-reat, il-prosekuzzjoni spjegat li l-allegat reat sar kollu “minn wara skrin” u "behind closed doors." Minħabba f’hekk, l-akkużata mhijiex magħrufa wiċċ imb wiċċ mill-vittmi.
Min-naħa tagħha, id-difiża insistiet li m’hemm l-ebda periklu li l-akkużata se taħrab mill-pajjiż. L-avukat difensur staqsa lill-qorti “fejn hija l-biża’ reali tal-intralċ tal-provi?", filwaqt li sostna li f’dan l-istadju l-akkużata m'għandhiex għalfejn tibqa’ tinżamm arrestata jekk hemm indirizz fiss u garanzija b’saħħitha.
Id-digriet dwar il-ħelsien mill-arrest se tingħata in camera.
Il-każ se jkompli nhar l-4 ta’ Ġunju fid-9am.
Il-Maġistrat Lara Lanfranco ppresediet.
Il-prosekuzzjoni qed titmexxa mill-Ispettur Claire Vella Borg flimkien mal-Avukati Marica Ciantar u Mauro Abela f’isem l-Avukat Ġenerali. Għal Bank of Valletta plc deher il-Professur Stefano Filetti, u għal Banif plc dehret l-Avukat Maria Lisa Buttiġieġ. Għall-akkużati dehru l-Avukati Roberto Spiteri, Alfred Abela, Rene Darmanin u Franco Galea.
