Ryan Bartolo, li jaħdem bħala mover tal-għamara, wieġeb mhux ħati għal akkużi li jinkludu vjolenza domestika, detenzjoni illegali u li kkawża biża’ ta’ vjolenza wara allegat inċident li wassal biex il-vittma kellha bżonn kura fl-isptar.
Il-qorti semgħet kif l-inċident beda wara nofsinhar tat-23 ta’ Marzu, meta Bartolo allegatament ċempel lis-sieħba tiegħu fuq ix-xogħol u akkużaha b’infedeltà, waqt li talabha tipprova fejn tinsab permezz ta’ video call.
Il-prosekuzzjoni qalet li s-sitwazzjoni eskalat meta l-mara rritornat id-dar aktar tard dakinhar, fejn allegatament ġiet attakkata quddiem it-tifel żgħir tagħhom.
Bejn il-5pm u s-1am, il-mara u l-minuri allegatament ma tħallewx joħorġu mir-residenza. L-akkużat allegatament ħadilha l-mobile, iċ-ċwievet, il-karta tal-identità u l-karti tal-kreditu biex ma tkunx tista’ titlob l-għajnuna.
Matul dan l-episodju, Bartolo allegatament talab lill-vittma biex tammetti li għandha relazzjoni ma’ raġel ieħor. Meta hi ċaħdet, il-vjolenza allegatament żdiedet.
Il-qorti semgħet li r-raġel allegatament sawwat lill-mara billi uża mqass u wire, qatta’ biċċiet minn xagħarha u pprova jifgaha. Il-pulizija ġew imsejħa fuq il-post, u hekk kif Bartolo nnota l-preżenza tagħhom, allegatament beda jgħannaq lill-vittma u ħeġġiġha tgħid lill-uffiċjali li kollox kien sew.
Meta l-pulizija kienu qed jippreparaw biex jisgassaw il-bieb, allegatament ħarab billi qabeż minn gallarija. Aktar tard instab moħbi ġo armarju fid-dar ta’ ommu, wara li qrabatu inizjalment qalu lill-pulizija li ma kienx hemm.
Il-prosekuzzjoni nnotat li Bartolo huwa reċidiv u kien diġà taħt sentenza sospiża ta’ tliet snin mill-2022, ordni ta’ probation mill-2025, u kundizzjonijiet ta’ ħelsien mill-arrest imposti fi Frar 2026. Id-diviża ma ressqet l-ebda talba għall-ħelsien mill-arrest, u l-qorti ħarġet ordni ta’ protezzjoni favur il-vittma.
L-Ispettur Audrey Micallef mexxiet il-prosekuzzjoni, waqt l-avukata Yanika Barbara dehret għal Bartolo.
