Il-Qorti terġa’ tirrifjuta ħelsien mill-arrest għall-familja Pace fil-każ ta’ użura u ħasil tal-flus

Għat-tieni darba, il-Qorti rrifjutat it-talba għall-ħelsien mill-arrest fil-konfront ta’ Keith Pace, 45 minn Santa Venera,  is-sieħba tiegħu Maria Grixti, 49 mill-Marsa, u ż-żewġt itfal Carlos u Cleaven Pace, età ta’ 24 u 20, b’rabta ma każ ta’ użura u ħasil ta’ flus.

Meta ġew arrestati, il-prosekuzzjoni spjegat li waqt operazzjoni tal-pulizija, uffiċjala skoprew madwar €120,000 fi flus kontanti moħbija fir-residenza tal-akkużat. Waqt l-istess raid, pulizija sabu wkoll numru ta’ għasafar eżotiċi, fejn is-serjetà tal-allegazzjonijiet kontrihom aktar żdiedu. 

Il-Magistrat Lara Lanfranco irrifjutat it-talba għall-ħelsien mill-arrest, fuq il-bażi tan-natura gravi tal-akkużi, kif ukoll il-possibilità tal-intralċ tal-provi. 

Il-prosekuzzjoni kienet immexxija mill-Ispettur Leanne Bonello, filwaqt li Neville Galea u Michael Muscat f’isem l-Avukat Ġenerali.  Avukati difensuri Arthur Azzopardi, Franco Debono, Marion Camilleri, Adreana Zammit u Jacob Magri dehru f’isem l-akkużati.