Raġel ta’ 31 sena arrestat fuq suspett ta’ traffikar ta’ droga wara rapport anonimu

Raġel ta’ 31 sena ġie arrestat ilbieraħ filgħaxija fuq suspett ta’ traffikar ta’ droga wara rapport anonimu li rċevew il-Pulizija.

Fi stqarrija, il-Pulizija qalu li għall-ħabta tat-8:30pm, huma rċevew rapport anonimu dwar raġel li allegatament kien qed jittraffika d-droga fi Triq it-Tamar, f’San Pawl il-Baħar. Il-Pulizija marru minnufih fuq il-post, fejn innutaw raġel li kien jaqbel mad-deskrizzjoni mogħtija fir-rapport.

Mad-dehra tal-karozzi tal-Pulizija, ir-raġel, li huwa ta' nazzjonalità Libjana, ipprova jaħrab minn fuq il-post, iżda ġie arrestat minnufih.

Wara tfittxija, il-Pulizija sabu diversi pakketti ta’ sustanzi suspettati li huma droga, kif ukoll ammont ta’ flus kontanti. Is-sustanzi misjuba allegatament jinkludu kokaina, kannabis, u MDMA.

Il-Pulizija komplew it-tfittxija fid-dar tas-suspettat, fejn allegatament sabu aktar droga u flus. Qalu wkoll li nstabu erba’ mobiles moħbija ġewwa sett televiżjoni.

Il-Maġistrat Antione Agius Bonnici inawgura inkjesta fuq il-każ, hekk kif l-investigazzjonijiet tal-Pulizija għadhom għaddejjin.

Is-suspettat bħalissa qed jinżamm taħt kustodja tal-Pulizija u mistenni jitressaq il-Qorti fil-jiem li ġejjin.