Mara b'ġrieħi serji wara li ġiet milquta minn karozza li baqgħet sejra

 Il-Pulizija rnexxielhom jinstabu l-vettura allegatament involuta fl-inċident, Toyota Vitz, u arrestaw raġel ta’ 26 sena minn San Ġwann

Mara ta' 30 sena sofriet ġrieħi serji wara li ġiet milquta minn karozza kmieni s-Sibt filgħodu.

Il-Pulizija ġew infurmati li l-inċident seħħ għall-ħabta tal-4am fi Triq id-Dragunara, f’San Ġiljan. Irriżulta li l-vittma, mara minn Ħal Għaxaq, kienet intlaqtet minn karozza li allegatament baqgħet sejra.

Il-vittma ttieħdet b’ambulanza lejn l-Isptar Mater Dei, fejn ġiet iċċertifikata li sofriet ġrieħi serji.

Ftit wara, il-Pulizija rnexxielhom jinstabu l-vettura allegatament involuta fl-inċident, Toyota Vitz, u arrestaw raġel ta’ 26 sena minn San Ġwann biex ikomplu bl-investigazzjonijiet.

Il-Maġistrat Philip Galea Farrugia qed imexxi l-inkjesta dwar il-każ.

L-investigazzjoni tal-Pulizija għadha għaddejja.

More in Qrati u Pulizija