Anzjan ta’ 81 sena, tressaq il-Qorti llum akkużat b’fastidju sesswali ta’ tifla ta’ ħames snin li daħħalha d-dar tiegħu bil-wiegħda li jagħtiha x’tixrob.
Il-każ beda dalgħodu, bit-tifla u missierha jixhdu wara l-bibien magħluqa.
L-anzjan kien akkużat li kkorrompa tifla taħt it-12-il sena, li pparteċipa f’attivitajiet sesswali magħha, li ġiegħel persuna vulnerabbli jkollha x’taqsam miegħu u li wettaq reat meta kien taħt probation fuq każ simili.
Għalkemm fil-Qorti ma ħarġux ħafna dettalji, hu mifhum li r-raġel bagħbas lit-tifla fil-partijiet privati tagħha meta daħħalha d-dar tiegħu biex tixrob.
L-anzjan qed iwieġeb mhux ħati tal-akkużi.
Il-Qorti ordnat li l-każ ikompli wara l-bibien magħluqa anke għax kellha tixhed it-tifla stess permezz ta’ videoconferencing.
Hekk kif xehdu kemm it-tifla u anke missierha, l-anzjan ingħata l-ħelsien mill-arrest fuq depożitu ta’ €5,000 u garanzija personali ta’ €15,000.
Kien ordnat jgħaddi lill-Qorti l-passaport u l-karta tal-identità u jiffirma darbtejn fl-għassa tal-Pulizija.