Il-Qorti - ppreseduta mill-Maġistrat Natasha Galea Sciberras - iddeċidiet illi hemm biżżejjed provi biex l-avukati Gianluca Caruana Curran u Charles Mercieca jitpoġġew taħt Att ta' Akkuża fuq l-attentat tixħim tal-ġurnalist Ivan Martin.
Hija osservat illi fil-każ ta' Caruana Curran id-difiża ma kkontestatx l-akkużi prima facie, filwaqt li fil-każ ta' Mercieca id-Difiża qalet illi kien hemm "nuqqas assolut ta' evidenza." Il-Qorti iżda ma qablitx ma' dan u qalet illi l-avukat kellu diversi laqgħat ma' Martin, inkluż waħda fl-uffiċċju tiegħu. Dan apparti li f'diversi risposti mibgħutha lil diversi Kmamar tal-Aħbarijiet wara li l-allegazzjonijiet saru pubbliċi dejjem jintuża l-plural u fl-ebda ħin, dawn l-allegazzjonijiet jew iċ-ċaħda tagħhom ma ġiet attribwita biss għal Caruana Curran.
F'digriet separat il-Qorti laqgħet l-oġġezzjonijiet tad-difiża dwar l-esebizzjoni tal-istqarrija ta' Martin lill-pulizija. Kien argumentat illi peress li Martin kien diġa' ta xhieda u ma kienx iddikjarat bħala xhud ostili, l-istqarrija tiegħu ma tistax tkun esebita.
Il-ġurnalist kien mar għand il-Pulizija jirrapporta konverżazzjoni illi fiha huwa jistqarr li ġie offrut bejn "żewġ u erba' karti tal-€500."
Caruana Curran u Mercieca qed jirrapreżentaw lil Yorgen Fenech, akkużat bil-qtil ta' Daphne Caruana Galizia.
Fl-aħħar seduta il-Qorti semgħet kif Martin kien irċieva messaġġ fuq il-WhatsApp minn Mercieca li staqsieh biex jiltaqgħu l-uffiċċju tiegħu, fil-Belt Valletta. Waqt din il-laqgħa Caruana Curran, Mercieca u Martin iddiskutew serje ta' stejjer fil-forma ta' kampanja biex jkun skreditat Melvin Theuma, is-sensar fl-assassinju tal-ġurnalista.
