Supretendent u żewġ Spetturi jitressqu l-Qorti akkużati li abbużaw mill-ħlas tas-sahra
32 uffiċjal ieħor mistennija jitressqu fil-jiem li ġejjin quddiem erba’ maġistrati differenti
More in Qrati u Pulizija
32 uffiċjal ieħor mistennija jitressqu fil-jiem li ġejjin quddiem erba’ maġistrati differenti
Supretendent tal-Pulizija u żewġ Spetturi tressqu l-Qorti llum akkużati li abbużaw mill-ħlas tas-sahra tal-Pulizija, każ li tista’ tgħid heżżeż it-Taqsima tat-Traffiku fi ħdan il-Korp.
It-tliet uffiċjali tressqu l-Qorti taħt arrest dalgħodu u wieġbu mhux ħatja tal-akkużi. 32 uffiċjal ieħor mistennija jitressqu fil-jiem li ġejjin quddiem erba’ maġistrati differenti.
L-allegati abbużi, li t-tliet uffiċjali kienu akkużati bihom, huma relatati mas-sahra li ħadmu biex jikkontrollaw it-traffiku waqt il-kostruzzjonital-flyover tal-Marsa.
L-Ispettur Bernard Bruce, f’isem il-prosekuzzjoni, spjega lill-Maġistrat Audrey Demicoli kif kien irċieva ittra mingħand whistleblower li kienet tallega li l-Pulizija kienu qed jabbużaw mis-sahra.
Minn hemm bdiet investigazzjoni sħiħa fosthom fuq is-sistema ta’ datatrack li kienet installata fuq il-muturi tal-Pulizija tat-traffiku.
Fil-fatt, minn din l-informazzjoni miġbura, irriżulta li kien hemm Pulizija li mhux vera kienu l-Marsa fil-ħinijiet li fihom niżlu s-sahra.
Irriżulta wkoll li minn 27 datatrackers li kienu installati fuq il-muturi, seba’ biss kienu qed jaħdmu.
“Fil-maġġoranza tal-każi, id-data miġbura uriet kif il-Pulizija kienu jkunu fi bnadi oħra u mhux fejn indikat minnhom,” spjega wieħed mix-xhieda.
Fil-Qorti ġie spjegat ukoll kif l-uffiċjali rritornaw is-€47,000 li allegatament ħadu b’qerq u għalhekk ma saret l-ebda talba għall-iffriżar tal-assi tagħhom.
Apparti minn hekk, instabu wkoll diversi chats fuq Whatsapp fejn l-uffiċjali kienu jiftehmu kif se jaħdmu s-sahra u kif se jitħallsu.
Il-Qorti qalet li jidher li hemm biżżejjed evidenza biex l-uffiċjali jitpoġġew taħt att ta’ akkuża.
Il-każ ikompli fit-22 ta’ Settembru.