Żagħżugħ akkużat li biegħ il-kokaina lil żagħżugħ ta' 17-il sena f'Paceville
L-akkużat wieġeb mhux ħati iżda nżamm arrestat
More in Qrati u Pulizija
L-akkużat wieġeb mhux ħati iżda nżamm arrestat
Żagħżugħ minn Ħal Qormi nżamm arrestat wara li tressaq il-Qorti akkużat li biegħ id-droga lil żagħżugħ ta’ 17-il sena f’Paceville.
Iż-żagħżugħ kien arrestat fil-lejl ta’ bejn is-Sibt u l-Ħadd wara li pulizija rawh jgħaddi kontenitur bil-ħaxixa tal-kannabis lil ħaddieħor f’Paceville.
Il-Pulizija wettqet tfittxija fuq l-akkużat u nstab li kellu fuqu wkoll 100 gramma kokaina.
Huwa kien akkużat li ssupplixxa u li kellu fil-pussess tiegħu l-kokaina u l-kannabis.
Aktar kannabis instabet fid-dar fejn jgħix.
L-Ispettur Joseph Xerri qal lill-Maġistrat Claire Stafrace Zammit li fl-istess lejl, żagħżugħ ta’ 17-il sena kien arrestat fil-klabb Havana wara li nstab li kellu l-kokaina.
Iż-żagħżugħ indika li l-akkużat kien tah id-droga.
L-akkużat qed iwieġeb mhux ħati tal-akkużi miġjuba kontrih, bl-Avukat Franco Debono jitlob il-ħelsien mill-arrest.
Debono saħaq li l-akkużat għadu żgħir u minkejja li kellu problema bid-droga, il-kondotta tiegħu hija nadifa.
Insista wkoll li l-ammont ta’ droga misjuba ma kinitx esaġerata
‘Għadu fi stadju fejn jista’ jkun salvat,” qal l-Avukat.
Madanakollu, il-Maġistrat ċaħdet it-talba għall-ħelsien mill-arrest, fosthom għax iż-żagħżugħ ta' 17-il sena għad irid jixhed.