Matthew Caruana Galizia sejjaħ għal dak li jikkunsidra bħala standards doppji mill-President tal-Parlament Ewropew Roberta Metsola u l-Partit Popolari Ewropew (EPP) fir-rigward tal-ġurnalisti li qed imutu bil-ġuħ f’Gaża.
Matthew, li huwa iben il-ġurnalista maqtula Daphne Caruana Galizia, telgħa post fuq Facebook nhar l-Erbgħa fejn qabbel kif il-mexxejja tal-UE rrispondew għall-assassinju ta’ ommu ma’ kif qed jikkonfrontaw il-mewt ta’ ġurnalisti li qed jirrappurtaw minn Gaża.
“Li kieku Roberta Metsola u politiċi oħra tal-EPP kellhom jitkellmu b’daqshekk qawwa għal kull wieħed minn dawn il-ġurnalisti kif għamlu għal ommi, kieku għandhom għomorhom kollu jitkellmu dwarhom.”
Metsola ilha titkellem pubblikament dwar iċ-ċirkostanzi li wasslu għall-assassinju ta’ Caruana Galizia fl-2017, u ppruvat tidher bħala d-difensur tad-drittijiet tal-ġurnalisti.
Iżda r-rifjut persistenti tagħha li tikkundanna b’mod dirett il-krimini tal-gwerra mniedija mill-Iżrael wassal għal rabja u diżapprovazzjoni. Ix-xahar li għadda, aktar minn 150 kittieb, akkademiku, artist u attivist Malti ffirmaw ittra miftuħa li fiha kkritikaw ir-risposta “bil-mod” tagħha għall-gwerra f’Gaża.
Huma akkużaw lil Metsola bi “kompliċità bis-skiet” u “rabja selettiva,” u indikaw kif ħadet pożizzjoni soda favur l-Ukrajna u l-ġustizzja għall-ġurnalista maqtula Daphne Caruana Galizia, filwaqt li kienet siekta dwar Gaża.
Id-dikjarazzjoni tiegħu waslet wara li l-aġenzija tal-aħbarijiet AFP qajmet l-allarm dwar il-kundizzjoni tal-ġurnalisti tagħha li qed isegwu s-sitwazzjoni f’Gaża, hekk kif il-ġuħ qiegħed jiggrava fil-reġjun. Ġurnalisti f’Gaża qalu li huma esausti u kellhom jieqfu jaħdmu biex ifittxu ikel.
Kelliem għall-President Metsola qal li jaqbel ma’ Caruana Galizia li ġew maqtula wisq ċittadini u ġurnalisti minn Iżrael f’Gaża.
“Dan hu suġġett li Roberta Metsola tkellmet dwaru bosta drabi u se tkompli tagħmel dan. Huwa għalhekk li ilha tappoġġja sforzi għal soluzzjoni paċifika u dejjiema. Il-President Metsola dejjem ħadet pożizzjoni favur il-ġurnalisti u ċ-ċittadini, u se tkompli tagħmel dan.”
.png)
