Il-kontroversja dwar il-liġijiet il-ġodda dwar l-ippjanar kompliet tiżdied hekk kif il-Partit Nazzjonalista ħareġ b’pożizzjoni ċara li jrid li l-abbozzi ta’ liġijiet ippubblikati reċentement mill-Gvern jiġu rtirati kompletament. Il-PN, fil-fatt, sejjaħhom bħala “skandalużi” u qed jipprepara mozzjoni fil-Parlament biex iressaq din it-talba.
Il-liġijiet, magħrufa bħala Bills 143 u 144, qed jattiraw kritika qawwija minn attivisti ambjentali u għaqdiet mhux governattivi li akkużaw lill-Gvern li ħareġ bir-riforma mingħajr konsultazzjoni pubblika xierqa. Saħansitra l-Prim Ministru Robert Abela ġie mhedded u mweġġaħ verbalment waqt laqgħat pubbliċi fuq il-kwistjoni.
Il-Partit Laburista kkundanna l-pożizzjoni tal-PN, jgħid li dan irid jirritorna għall-proċessi burokratiċi u bla effiċjenza li kienu jeżistu taħt il-Gvernijiet ta’ GonziPN. Skont il-PL, dan ifisser li l-PN hu kontra li ċittadini jingħataw is-setgħa li jwaqqfu xogħlijiet ta’ kostruzzjoni waqt li jkunu qed jappellaw permessi – pass li jnaqqas mill-protezzjoni tar-residenti u joħloq inċertezza legali.
“Din hi daqqa ta’ ħarta għal dawk li dejjem mxew mal-liġi, għax il-PN jidher li hu kontra li jiġu indirizzati illegalitajiet tal-passat fejn min kiser il-liġi jħallas għall-għemilu,” qal il-PL f’reazzjoni uffiċjali. “Il-PN jidher li jippreferi li n-nies jibqgħu jistennew għal snin, bħalma kien jiġri meta sempliċiment biex tiftaħ tieqa, MEPA kienet taqlalek qalbek.”
Min-naħa tiegħu, il-Gvern qed jinsisti li dawn il-liġijiet se jġibu iktar dixxiplina, ċarezza u ċertezza – kemm għal min japplika għal permess kif ukoll għal min joġġezjona. “Din hi paġna ġdida li se tinfetaħ f’pajjiżna fil-qasam tal-ippjanar,” saħaq il-Gvern. “Se jkun hemm iktar sensittività u responsabbiltà favur żvilupp iktar sostenibbli.”
Il-Gvern tenna li hu lest li jkompli d-diskussjonijiet u jisma’ s-suġġerimenti mingħand il-pubbliku u l-entitajiet kkonċernati. Iżda fl-istess waqt, qed jissokta biex ma jħallix li r-riformi jitferrxu jew jiġu abbandunati taħt pressjoni politika.
