Il-Partit Nazzjonalista hedded li se jniedi azzjoni legali u jipprotesta jekk ir-riżultati tal-inkjesta maġisterjali dwar il-każ ta’ 17 Black ma jkunux ippubblikati b’mod trasparenti jew jekk jiġu mmanipulati.
“Ir-rapport tal-Inkjesta Maġisterjali dwar il-kumpanija 17 Black u l-Panama Papers għandu jiġi ppubblikat mill-Avukat Ġenerali mingħajr aktar dewmien biex il-poplu Malti u Għawdxi jkun jaf kemm insteraq bil-korruzzjoni,” qal il-Partit nazzjonalista fi stqarrija s-Sibt filgħodu.
Il-Ġimgħa, ħarġet informazzjoni li l-inkjesta kriminali li saret f’dan l-ambitu, ikkonkludiet li numru ta’ eks uffiċjali għolja fil-gvern u kumpaniji oħra għandhom jiġu akkużati għal pjanijiet biex jirċievu flus marbuta mal-proġett Electrogas.
Skont informazzjoni li nkitbet fil-Panama Papers, il-kumpaniji ta’ Schembri u Mizzi fil-Panama kellhom jirċievu flus għal ammont ta’ €150,000 kull xahar minn 17 Black.
Il-PN esprima tama li l-Prim Ministru Robert Abela ma jużax ir-riżultati tal-inkjesta għall-vantaġġ politiku tiegħu.
“Il-Partit Nazzjonalista jistenna li l-Inkjesta Maġisterjali ma tispiċċax f’idejn Robert Abela biex biha jagħmel manuvri politiċi għall-interessi personali tiegħu kif għamel b’mod abbużiv u illegali bir-rapport tal-Inkjesta dwar Vitals u Steward. Jekk dan iseħħ, il-Partit Nazzjonalista se jkun qiegħed jiġġieled dan l-abbuż sfaċċat permezz ta’ azzjonijiet u proċeduri fil-qrati u fit-toroq ta’ pajjiżna,” il-PN żied jgħid.
L-Oppożizzjoni qalet li l-azzjonijiet ta’ abbuż se jiġu opposti b’azzjoni legali u protesti fil-qorti u fit-toroq tal-pajjiż.
Karol Aquilina, il-Kelliem tal-Oppożizzjoni għall-Ġustizzja, u l-MP li ffirma din l-istqarrija, appella lill-Prosekutur Ġenerali Victoria Buttigieg biex tiżgura li r-riżultati tal-inkjesta jiġu ttrattati b’mod professjonali, u enfasizzat li kwalunkwe dewmien jew “inkompetenza” se jiltaqgħu b’oppożizzjoni qawwija.
Il-Partit Nazzjonalista insista li l-persuni kollha li huma involuti fil-korruzzjoni għandhom jiġu pprosekutati malajr u b’mod ġust, u wettqu twissija kontra kwalunkwe tentattiv biex jiġu protetti dawk responsabbli mill-korruzzjoni.
‘Addio rule of law’ – PL jirrispondi
Jirrispondi lill-PN, il-Partit Laburista qal li Karol Aquilina, “il-perċimes tal-faxxa estremista li tmexxi lil Bernard Grech minn imnieħru,” ħareġ ċar kemm tal-PN huma “ddisprati għall-poter tant li nfexxu jheddu biex isaħħnu l-irjus tan-nies.”
“Issa addijo rule of law u addijo “ħallu l-istituzzjonijiet jaħdmu” għax Aquilina, f’waħda mis-soliti dagħdigħat tiegħu ta’ fanatiċiżmu politiku, infexx jgħajjar u jhedded, mingħalih, lill-Prim Ministru Robert Abela,” l-istqarrija qrat.
Il-PL qal li l-Prim Ministru mhu se jibża’ mill-ebda theddid imma se jħalli l-proċeduri legali jieħdu l-perkors tagħhom, u jħalli l-Qrati u l-istituzzjonijiet jaħdmu bil-libertà sħiħa ħalli l-ġustizzja ssir.
“L-istess Aquilina, li sa ftit tal-ġimgħat ilu l-politiku Nazzjonalista fallut, Jason Azzopardi, sejjaħlu buġarrun, imma issa reġgħu ‘tgħannqu’ f’dagħdigħa ta’ mibegħda kontra l-Gvern Laburista, infexx ukoll jattakka, bi ħdura insensata, lill-Avukat Ġenerali,” il-PL żied jgħid.
