Il-Forzi Armati ta' Malta (AFM) għadhom ma lestewx studju dwar l-implimentazzjoni ta' sistema nazzjonali ta' difiża mill-ajru, skont kelliem tal-AFM f'kummenti lill-gazzetta oħt, MaltaToday.
Dan l-istudju huwa wieħed mill-impenji elenkati fl-istrateġija ta' għaxar snin tal-AFM, ippubblikata fl-2016 u li tkopri sa l-2026. Taħt it-taqsima tar-Riformi Operattivi, l-AFM wegħdu li ‘għandu jitnieda studju sabiex tiġi kkunsidrata l-implimentazzjoni ta' Sistema Nazzjonali ta' Difiża mill-Ajru’.
"Irridu nammettu li l-istudju għadu ma tlestiex," qal il-kelliem tal-AFM meta ġie mistoqsi. Fil-preżent, l-AFM għandha kapaċitajiet limitati ħafna għad-difiża mill-ajru, li huma pprovduti minn D Company tal-1st Regiment. Il-militar m’għandux sistemi ta’ missili, drones jew ajruplani tal-ġlied, u l-apparat tad-difiża mill-ajru huwa limitat għal mortars, RPGs, u kanuni qawwija anti-ajru.
Dan l-iżvilupp jiġi fi żmien fejn il-kunflitti fil-Lvant Nofsani u l-gwerra fl-Ukrajna qed juru l-impatt tal-proliferazzjoni ta’ missili ballistiċi u drones fuq kunflitti. F'dan il-kuntest, l-eks deputat kummandant tal-AFM, il-Kurunell David P. Attard, ħeġġeġ lill-AFM biex iqisu dan ix-xenarju ta' sigurtà fil-Mediterran u l-Ewropa.
Effettivament, il-politika tal-2016 irrikonoxxiet id-diffikultà biex tkun ippjanata strateġija għaxar snin fid-dawl ta' ‘xenarju ta' sigurtà inċert’. Madankollu, il-politika tenfasizza l-ħtieġa ta' pjan medju u fit-tul sabiex jiġu implimentati kapaċitajiet militari ġodda u meħtieġa.
Il-politika tispeċifika wkoll li “l-armi individwali għandhom jiġu mmodernizzati filwaqt li oġġetti antiki għandhom jitneħħew b'mod xieraq.” Il-kelliem tal-AFM qal li bħalissa għaddejjin taħditiet ma' alleati oħra tan-NATO sabiex jiġi evalwat l-aħjar mod għal modernizzazzjoni tal-armi skont il-bżonnijiet tal-AFM.
Minkejja li ma ngħatawx aktar dettalji dwar dan, meta ġie mistoqsi jekk l-armament tal-AFM huwiex skont l-istandards tan-NATO, il-kelliem spjega: “Hemm diversi kalibri tal-NATO, iżda dawk l-aktar użati jinkludu 5.56 x 45mm, 7.62 x 51mm, u 9 x 19mm, li l-AFM tagħmel użu minnhom.”
Wieħed mill-punti prinċipali tal-politika kien il-bżonn li tinħoloq Unità ta’ Operazzjonijiet Speċjali sabiex tikkonsolida kompiti ta’ gwerra speċjali kollha taħt l-AFM. Din l-unità ġiet iffurmata fl-2017.
