Stand ta’ Graffitti fl-Università jitneħħa matul il-lejl, KSU jgħid li ma kienx hemm qbil fuq materjal imqassam

L-istand ta’ Moviment Graffitti waqt il-ġimgħa tal-freshers fl-Università ta’ Malta ġie mneħħi matul il-lejl tat-Tlieta, bl-attivisti jallegaw li l-Kunsill Studenti Universitarji (KSU) aġixxa minn wara daharhom u kkonfiska l-materjal esebit.

F'post fuq Facebook nhar l-Erbgħa, Moviment Graffitti ppublika ritratt tal-kubu tagħhom vojt u qal li l-KSU neħħa l-istand matul il-lejl u ħa l-materjal kollu li kien fih.

Skont Moviment Graffitti, dan il-pass ittieħed minħabba li l-materjal kien relatat mad-drittijiet riproduttivi.

“L-Università suppost hija ċentru ta’ diskussjoni u ideat, mhux biss fl-Università imma fil-pajjiż kollu,” qalu l-attivisti. “Madankollu, jidher li l-KSU jaħseb li għandu xi tip ta’ drittijiet morali, u li għandu jiddetta x’għandhom jew m’għandhomx jiddiskutu l-istudenti.”

F’dikjarazzjoni, il-KSU qal li ħa d-deċiżjoni li ma jippermettix lil “entitajiet relatati mal-abort” jipparteċipaw fil-ġimgħa tal-Freshers, irrispettivament minn jekk huma favur il-ħajja jew favur l-għażla.

“Aħna nemmnu li dan l-avveniment ma jipprovdix pjattaforma adegwata għal din id-diskussjoni biex issir bil-gravità li jistħoqqilha,” qal il-kunsill.

Il-KSU qal li Moviment Graffitti injora d-deċiżjoni tagħhom billi għażel li juri kontenut favur l-għażla fuq l-istand tagħhom.