L-approvazzjoni ta’ emendi legali i li se jagħtu possibbilità li żgħażagħ ta’ 16 jew 17-il sena jilħqu Sindki jew Viċi-Sindki mistenni jintemm it-Tnejn li ġej, bit-tielet qari tal-abbozz ta’ liġi relattiv.
Il-Ministru għall-Wirt Nazzjonali, l-Arti, u Gvern Lokali, Owen Bonnici, flimkien mas-Segretarju Parlamentari għall-Gvern Lokali, Alison Zerafa Civelli, dan l-aħħar mexxew avveniment b’kollaborazzjoni mal-Kunsill Nazzjonali taż-Żgħażagħ ta’ Malta (KNŻ). L-inizjattiva kellha l-għan li tiffaċilita d-diskussjonijiet dwar il-parteċipazzjoni taż-żgħażagħ fil-governanza lokali u l-prospetti assoċjati mat-tnaqqis tal-età tal-vot għal 16-il sena.
Allinjata mas-serje ta' avvenimenti li għaddejjin bħalissa bit-tema 'Empower Youth Voices' mill-KNŻ, il-konferenza sservi bħala element ċentrali biex titrawwem kultura ta' attiviżmu fost iż-żgħażagħ Maltin u Għawdxin. L-għan huwa li titwitta t-triq għal rappreżentanza msaħħa taż-żgħażagħ fil-governanza lokali filwaqt li tingħata s-setgħa lill-mexxejja żgħażagħ u jiġi promoss l-impenn ċiviku.
Il-leġiżlazzjoni proposta ġabret tifħir minn Rareș Voicu, membru tal-bord tal-Forum taż-Żgħażagħ Ewropej (YFJ), li faħħar id-deċiżjoni proattiva ta’ Malta. Voicu enfasizza l-ħtieġa ta’ programm komprensiv ta’ edukazzjoni ċivika biex jiġi żgurat li drittijiet ġodda għaż-żgħażagħ ikunu aċċessibbli. Dan il-pass kuraġġuż lejn l-amplifikazzjoni tar-rappreżentanza taż-żgħażagħ kemm fil-livell lokali kif ukoll nazzjonali huwa mistenni li jagħti eżempju pożittiv għal pajjiżi oħra, partikolarment fi ħdan l-Unjoni Ewropea.
Il-President tal-KNŻ Mariah Zammit qalet li din il-liġi se tippermetti żgħażagħ taħt it-18 il-sena li jservu bħala Sindki jew Viċi-Sindki.
Waqt l-attività, il-Ministru Bonnici qal li l-għoti ta’ l-opportunità liż-żgħażagħ ta’ 16-il sena biex iservu bħala Sindki jirrikonoxxi l-kapaċitajiet tagħhom, irawwem sens ta’ responsabbiltà u jqajjem impenn ċiviku minn età żgħira, filwaqt li enfasizza l-potenzjal għal perspettivi ġodda u ideat innovattivi.
Is-Segretarju Parlamentari Zerafa Civelli tenniet r-rikonoxximent tal-Gvern tal-importanza tal-opinjonijiet taż-żgħażagħ u l-attiviżmu fil-ħajja pubblika, u kompliet tgħid fuq l-importanza tal-impenn tagħhom li jrawmu soċjetà inklużiva u demokratika. Din l-inizjattiva għandha l-għan li tipprovdi lill-individwi żgħażagħ bl-appoġġ u l-opportunitajiet biex jinvolvu ruħhom b’mod attiv fit-tiswir tal-komunitajiet tagħhom.
