L-eks Deputat Laburista Silvio Grixti kiser is-skiet tiegħu dwar l-iskandlu tal-benefiċċji tad-diżabilità li ħalliet marka fuq il-karriera politika tiegħu. Madankollu, minflok ma ħa r-responsabbiltà tal-involviment tiegħu, Grixti akkuża deputat Nazzjonalista li kien implikat fil-bejgħ ta’ ċertifikati mediċi frawdolenti fl-2018.
F’post fuq Facebook nhar it-Tlieta, Grixti qasam ritratt ta’ ċertifikat mediku użat minn individwi li qed ifittxu benefiċċji mediċi u qal "Għaliex, meta kien hemm rapporti fil-midja fil-passat riċenti dwar abbużi b'dawn iċ-ċertifikati, il-pulizija ma investigatx u aġixxiet qisu kollox maħfur?"
L-allegazzjonijiet pubbliċi ta’ Grixti kienu primarjament diretti lejn ix-Shadow Minister tas-saħħa Stephen Spiteri, li, fl-2018, inqabad ibigħ iċ-ċertifikati mediċi għal €5 il-wieħed. L-iskandlu dwar l-involviment ta’ Spiteri fil-bejgħ taċ-ċertifikati qabel kien qajjem tħassib dwar l-integrità tas-sistema tal-benefiċċji tad-diżabilità.
L-eks Deputat Laburista semma wkoll lill-Ministru tas-Saħħa Chris Fearne, fejn talab l-opinjoni tiegħu dwar il-kwistjoni: "X'taħseb Chris Fearne???"
Din hija l-ewwel darba li Grixti tkellem pubblikament dwar l-iskandlu tal-benefiċċji soċjali, li ħareġ f’Settembru li għadda. Grixti kien implikat fi skema estensiva, mifruxa fuq diversi snin fejn persuni mingħajr diżabilitá bdew jirċievu b’mod frawdolenti il-benefiċċju ta’ diżabilità ta’ kull xahar. L-involviment tiegħu ħareġ wara l-aħbar li kien interrogat mill-Pulizija b’rabta ma’ dokumenti mediċi frawdolenti. Sussegwentement, huwa rriżenja mill-parlament fl-20 ta’ Diċembru iżda ngħata l-ħelsien mill-arrest tal-pulizija.
Il-ġimgħa li għaddiet, Silvio Grixti sab ruħu jiġi interrogat mill-pulizija għat-tieni darba b’rabta mal-iskandlu tal-benefiċċji tad-diżabilità.
