Mistoqsi jekk hux se jkun qed jattendi għal attivitajiet jew inkella ċerimonji li jfakkru l-ħames anniversarju mill-assassinju ta' Daphne Caruana Galizia, nhar il-Ħadd li ġej, il-Prim Ministru Robert Abela qal illi hu wera' r-rispett lejn il-familja Caruana Galizia minn meta kien elett fil-kariga fl-2020 u sostna illi dan ir-rispett huwa "l-aqwa mod ta' kif tista' ssellem il-memorja, ta' kuljum mhux f'anniversarju, billi urejt rispett lejn il-familja u billi insistejt ukoll li ssir ġustizzja," qal Abela.
Huwa qal ukoll li l-abbozz dwar il-Midja u l-Libertà tal-Espressjoni u l-qbil mal-Istitut tal-Ġurnalisti Maltin li sar ilbieraħ biex għalissa jieqaf il-proċess relatat ma' dan l-abbozz, huma passi fid-direzzjoni t-tajba. Fil-laqgħa tal-bieraħ kien miftiehem li l-Prim Ministru se jikteb lill-Imħallef Michael Mallia li jmexxi il-Kumitat tal-Esperti u jistaqsih biex il-kumitat iżomm process ta’ konsultazzjoni fuq l-abbozzi kif mitlub mill-IĠM.
Il-PM Abela temm jgħid, f'kummenti mal-ġurnalisti dalgħodu, li lura fis-sena 2020 - ftit biss wara li kien elett Prim Ministru - kienet "solvuta" l-problema u l-kontroversja tal-fjuri fi ħdan il-monument tal-Assedju l-Kbir, wara ġimgħat illi matulhom - b'mod ripetut - ħaddiema tal-Gvern kienu ordnati jneħħu l-fjuri u ritratti li jfakkru l-assassinju. Abela kien qal illi dawn ma għandhomx jintmessu aktar.