Tliet snin ħabs għal żagħżugħ li għen persuni biex jidħlu jew iħallu Malta illegalment

Żagħżugħ ingħata sentenza ta' tliet snin ħabs wara li wieġeb ħati ta' traffikar uman hekk kif ammetta li għen immigranti biex jidħlu jew iħallu lil Malta illegalment.

Iż-żagħżugħ, li għad għandu 26 sena, huwa mis-Somalja iżda jgħix Ħaż-Żabbar.

Huwa tressaq il-Qorti dalgħodu quddiem il-Maġistrat Ian Farrugia. L-Ispettur Karl Roberts spjega kif ir-raġel ġie arrestat wara li l-Pulizija rċeviet informazzjoni minn persuni anonimi.

Kien akkużat li fl-20 ta' Lulju u anke fix-xhur ta' qabel, għen persuni biex jidħlu jew iħallu Malta illegalment għall-flus. Kien akkużat ukoll li għamel dikjarazzjoni falza f'dokument pubbliku u anke b'rapport falz lill-Pulizija

Huwa ammetta minnufih u ngħata sentenza ta' tliet snin ħabs.